میگھن مارکل شادی کے بعد شہزادی نہیں کہلائیں گی

جب سے شہزادے ہیری اور میگھن مارکل نے اپنی منگنی کا اعلان کیا ہے دنیا بھر کے لوگوں کی دلچسپی ان کی شادی میں بڑھ گئی ہے۔ آپ کو یہ جان کر حیرت ہوگی کہ میگھن مارکل شہزادے ہیری سے شادی کے بعد شہزادی نہیں کہلائیں گی۔ برطانوی شاہی خاندان کی روایات کے مطابق شہزادہ یا شہزادی کہلانے کا اختیار صرف شاہی خاندان سے تعلق رکھنے والے افراد کو دیا جاتا ہے۔ چونکہ کیٹ مڈلٹن اور میگھن مارکل شاہی خاندان سے تعلق نہیں رکھتیں تو ان کے نام کے ساتھ شہزادی نہیں لگایا جاسکتا۔ کیٹ مڈلٹن کو شہزادے ولیم سے شادی کے بعد ڈچز آف کیمبرج کا اعزازی نام دیا گیا تھا۔ ان ہی کی طرح میگھن مارکل کو بھی ایک اعزازی نام دیا جائے گا۔ میگھن کو یہ اعزازی نام شہزادے ہیری کو اعزازی نام ملنے کے بعد ہی دیا جائے گا۔ برطانوی میڈیا کے مطابق شہزادے ہیری کو شادی کے بعد "ڈیوک آف سسیکس" کا خطاب ملنے کے امکانات ہیں۔ اگر انہیں یہ خطاب ملے گا تو میگھن مارکل کو ڈچز آف سسیکس کا خطاب ملے گا۔ میگھن مارکل کبھی شہزادی نہیں بن سکتیں مگر ان کے اور شہزادے ہیری کے تمام بچے شہزادے اور شہزادیاں ہی ہوں گے۔
This entry was posted in تفریح, اہم خبریں. Bookmark the permalink.