پی ٹی آئی کی ‘تحریک احتساب’ کا آغاز

ik

پشاور: پاکستان تحریک انصاف کی 'تحریک احتساب ' کا آغاز پشاور سے ہوگیا، صبح ہی سے کارکنوں کی بڑی تعداد پیر زکوڑی پل رنگ روڈ پر جمع ہونا شروع ہوگئی تھی تاکہ وہ عمران خان کا خطاب سن سکیں اور ان کے ساتھ آگے بڑھ سکیں۔

پاکستان تحریک انصاف (پی ٹی آئی ) کی احتساب ریلی جی ٹی روڈ سے خیر آباد اٹک تک جائے گی اور اس دوران عمران خان 6 مقامات پر خطاب کریں گے۔

ik 2

پشاور رنگ روڈ پیر زکوڑی پل سے تحریک احتساب کا اغاز کرتے ہو ئے پارٹی کارکنوں سے خطاب میں تحریک انصاف کے چیئر مین عمران خان نے کہا کہ جب تک نواز شریف خود کو احتساب کے لئے پیش نہیں کریں گے کارکن سڑکوں پر رہیں گے۔

عمران خان کا کہنا تھا کہ نیب صرف پٹواریوں کو پکڑ رہی ہے بڑے بڑے مگر مچھ آزاد گھوم رہے ہیں،عمران خان کے خطاب کے بعد احتساب ریلی کا قافلہ اپنی منزل کی طرف روانہ ہو گیا۔

ik3

اس موقع پر کارکنوں کا جوش و خروش دیدنی تھا اور وہ ڈھول کی تھاپ پر رقص کررہے تھے۔

احتساب تحریک کے لیے عمران خان کا کنٹینر بھی پہنچا دیا گیا ہے اور عمران خان احتساب تحریک سے مزید پانچ خطابات کریں گے۔

عمران خان کا دوسرا خطاب پبی ، تیسرا نوشہرہ ، چوتھا اکوڑہ خٹک ، پانچواں جہانگیرہ اور اختتامی خطاب خیر آباد اٹک کے مقام پر ہوگا, نوشہرہ کے مقام پر وزیر اعلی خیبر پختونخوا پرویز خٹک ریلی میں شریک ہوں گے۔

ik4

احتساب تحریک میں شرکاء کا لہو گرم رکھنے اور ماحول کو خوشگوار رکھنے کیلئے ڈی جے بٹ کی خدمات بھی حاصل کی گئی ہیں۔

ڈی جے بٹ نے اس بار ریلی کے شرکاء کیلئے نئے نغمے اور ترانے تیار کیے ہیں۔

احتساب تحریک مارچ کے لیے سیکورٹی کے بھی خصوصی انتظامات کئے گئے ہیں اور 700پولیس اہلکاروں کی ڈیوٹی لگائی گئیں ہیں جبکہ ریلی کے لیے جی ٹی روڈ کو بند نہیں کیا جا ئے گا۔

ik5

ریلی کے حوالے سے پی ٹی آئی کے کارکنوں میں بھرپور جوش و خروش پایا جاتا ہے اور اتوار کو چھٹی کا دن ہونے کی وجہ سے بھی لوگ بڑی تعداد میں شرکت کررہے ہیں۔

ریلی میں بچوں اور خواتین کی بھی بڑی تعداد موجود ہے جنہوں نے چہروں پر تحریک انصاف کے پرچم بنوائے ہوئے ہیں۔

 
This entry was posted in قومی, اہم خبریں. Bookmark the permalink.