آشیانہ اقبال ہاؤسنگ سکیم کے حوالے سے ایک کے بعد ایک نیا سکینڈل سامنے آرہا ہے جس میں مبینہ کرپشن کے الزام میں ایل ڈی اے کے سابق ڈی جی احد چیمہ نیب کی حراست میں ہیں۔ ایک طرف اُن کے خلاف تحقیقات جاری ہے تو دوسری طرف اُن کے رشتہ داروں کی جائیدادوں کا ریکارڈ بھی طلب کر لیا گیا ہے۔
نیب حکام کی طرف سے ایل ڈی اے حکام کو احد چیمہ کی اہلیہ سمیت سات عزیزوں کی فہرست تھمائی گئی ہے کہ اِن افراد کی جائیدادوں کا ریکارڈ جلد نیب کے حوالے کیا جائے۔ احکامات ملنے کے بعد ایل ڈی اے حکام نے مذکورہ افراد کی جائیدادوں کا ریکارڈ مرتب کرنا شروع کر دیا ہے۔