اسلام آباد(مانیٹرنگ ڈیسک)وزیر اعظم نواز شریف سے ارکان پارلیمنٹ نے ملاقات کی جس میں مختلف علاقوں میں جاری ترقیاتی منصوبوں کی صورت حال پر بات چیت ہوئی۔
میڈیا رپورٹس کے مطابق ملاقات کرنے والے ارکان پارلیمنٹ میں رضا حیات، چودھری نزیر اور عبدالرحمان خان کانجو شامل تھے۔ ملاقات کے دوران وزیر اعظم نواز شریف نے منتخب نمائندوں کو اپنے حلقوں میں جاری ترقیاتی کاموں کو مقررہ وقت کے اندر پایہ تکمیل تک پہنچانے کی ہدایت کی۔ اس موقع پر سانحہ پشاور کے شہداءکیلئے دعا بھی کی گئی ۔ ملاقات کے دوران وزیر اعظم کا کہنا تھا کہ بزدلانہ کارروائیوں سے دہشت گردی کیخلاف قوم کے حوصلے پست نہیں ہونگے۔ انہوں نے کہا کہ آپریشن ضرب عضب کامیابی سے جاری ہے اور ملک سے دہشت گردی اور انتہا پسندی کا خاتمہ کر کے ہی دم لیا جائے گا۔