مخدوش عمارت میں رہائش پذیر افراد کی جان بچانے کےلیے انہیں فائر بریگیڈ کی اسنارکل کے ذریعے نکالا گیا۔ عمارت اتنی مخدوش ہو چکی تھی کہ اس کی سیڑھیاں تک گر گئی تھیں۔ خوش قسمتی سے کوئی جانی نقصان تو نہ ہوا تاہم رہائش پذیر افراد خطرے سے دوچار ہو گئے تھے۔ عمارت سے بحفاظت نکالے گئے مکینوں اور ان کے رشتہ داروں نے احتجاجا دھرنا دے کر روڈ ٹریفک کے لیے بند کر دی۔ پولیس کی جانب سے مظاہرین کو ہٹا کر سڑک ٹریفک کے لیے کھول دی گئی۔ مخدوش عمارت کے مالک تسلیم احمد کا کہنا ہے کہ کئی سال پہلے مخدوش عمارت کے حوالے سے متعلقہ ادارے اور کرائے داروں کو آگاہ کر دیا تھا۔ مخدوش عمارت خالی کرانے کے لئے مذاکرات ایس ایس پی ساؤتھ ثاقب اسماعیل میمن کی سربراہی میں ہوئے۔ مذاکرات میں 5 لاکھ روپے فی خاندان دینے کی یقین دہانی کرائی گئی تو مکین عمارت خالی کرنے پر آمادہ ہو گئے۔ عمارت میں محصور 4 فیملیز کو اسنارکل کی مدد سے باہر نکالا گیا۔ مکینوں کا سامان نکالنے کیلئے بھی اقدامات کئے جائیں گے۔