عمران خان کا آگے بڑھنے کافیصلہ درست تھا، خطرہ جمہوریت کو نہیں نواز شریف کو ہے: شیخ رشید

اسلام آباد : عوامی مسلم لیگ کے سربراہ شیخ رشید نے کہا ہے کہ عمران خان کا عوامی تحریک کے ساتھ چلنا درست فیصلہ تھا، گورنمنٹ کی پالیسی تھی کہ دونوں کو الگ الگ مارا جائے ، سرکاری ٹی وی پر حملے کی مذمت کرتے ہیں۔ پریس کانفرنس سے خطاب کرتے ہوئے شیخ رشید نے کہا کہ عمران خان سمیت تمام پارٹیوں نے کہا کہ الیکشن میں دھاندلی ہوئی، انہوں نے کبھی جمہورت کو ڈی ریل کرنے کی بات نہیں کی۔ مولانا فضل الرحمان کہتے ہیں دھرنوں کو طاقت سے ختم کر دو، انہوں نے دھرنے والوں کو دہشت گردوں سے تشبیہ دی، مولانا فضل الرحمان انتقام لینا چاہتے ہیں، ان کے اندر 4 وزارتیں بول رہی ہیں۔ انہوں نے کہا کہ محمود اچکزئی کے بھائی گورنر بلوچستان ہیں، انہیں زیارت حملے کی بھی مذمت کرنی چاہئے۔شیخ رشید نے کہا کہ عدلیہ اور فوج کو سیاسی معاملے میں گھسیٹا جا رہا ہے، ملک میں سرمایہ کاری بھی سوالیہ نشان بنی ہوئی ہے، نندی پور پراجیکٹ پر کام کرنے والی کمپنی بلیک لسٹ ہے، قوم کا پیٹ تقریروں سے نہیں بھرا جا سکتا۔ سربراہ عوامی مسلم لیگ کا کہنا تھا کہ جمہوریت اور پارلیمینٹ کو تو نہیں البتہ نواز شریف اور شہباز شریف کو خطرہ ضرور ہے جبکہ الیکٹرانک میڈیا کو جتنا خطرہ نواز شریف سے ہے کسی اور لیڈر سے نہیں ہے۔ ایک سوال کے جواب میں شیخ رشید کا کہنا تھا کہ چین کے صدر کا تاریخی استقبال کریں گے۔