اٹھارہ ہزاری بند تباہ،سیلابی پانی قصبے میں داخل، 88 ہزار 895 ایکڑ اراضی تباہ ہونے کا خدشہ

جھنگ:ہیڈ تریمو اور جھنگ شہر کو بچانے کیلئے اٹھارہ ہزاری بند کو دھماکہ خیزم اڑا دیا گیا ہے جس کے بعد سیلابی ریلا قصبے کی جانب بڑھنے لگا ہے۔ تفصیلات کے مطابق اٹھارہ ہزاری بند پر گزشتہ روز دھماکہ خیز مواد نصب کیا گیا تھا جسے آج دھماکے سے اڑا دیا گیا ہے جبکہ ابھی مزید 2 دھماکے اور کئے جائیں گے تاکہ پانی کی رفتار بہتر ہو سکے۔ ذرائع کے مطابق بند ٹوٹنے کے بعد پانی احمد پور سیال، واسو اور لیہ روڈ کی کیساتھ ساتھ اٹھارہ ہزاری قصبے کی جانب بڑھنا شروع ہو گیا ہے جس کے نتیجے میں 88 ہزار 895 ایکڑ اراضی کو نقصان پہنچنے کا اندیشہ ہے جبکہ 25 ہزار 595 ایکڑ کپاس کی فصل بھی تباہ ہو جائے گی۔