گڈانی پاور منصوبہ قابل عمل نہیں، چین کا سرمایہ کاری سے انکار

چین نے گڈانی پاور منصوبے کو ناقابل عمل قرار دیتے ہوئے منصوبے پر سرمایہ کاری کرنے سے انکار کر دیا ہے۔ ذرائع کا کہنا ہے پاک چین انرجی ورکنگ گروپ کے اجلاس میں چین نے پاکستان کو گڈانی پاور پراجیکٹ میں سرمایہ کاری نہ کرنے کے اپنے فیصلے سے آگاہ کر دیا ہے۔ حکومت نے چین کی مدد سے گڈانی میں 6600 میگا واٹ کول پاور پلانٹ لگانے کا منصوبہ بنایا تھا۔ ذرائع کے مطابق جن منصوبوں پر آئندہ ماہ دستخط ہونگے ان کی فہرست جاری کر دی گئی۔ نئی فہرست میں خیبرپختونخوا، تھر، پورٹ قائم، گوادر اور پنجاب کے منصوبے شامل ہیں۔ تھر میں 1900 میگا واٹ کے کول پاور منصوبے لگائے جائیں گے۔ پختونخوا میں سکھی کیناری اور کروٹھ پن بجلی منصوبے نئی فہرست میں شامل ہیں۔ رحیم یار خان، ساہیوال اور مظفر گڑھ میں 1320 میگا واٹ کول پاور منصوبہ اور سندھ میں 250 میگا واٹ کے ونڈ پاور پراجیکٹ شروع کیے جائیں گے۔ چولستان میں ہزار میگا واٹ قائد اعظم سولر منصوبہ بھی فہرست میں شامل ہے۔