پرویزمشرف کیخلاف ٹرائل جاری رکھنے کی استدعا مسترد

اسلام آباد : خصوصی عدالت نے سنگین غداری کیس میں صرف پرویز مشرف کیخلاف ٹرائل جاری رکھنے کی استغاثہ کی استدعا مسترد کردی، اسلام آباد ہائیکورٹ کے حکم امتناع کے باعث سماعت 18 فروری تک ملتوی کردی گئی۔

سابق صدر پرویز مشرف کیخلاف سنیگن غداری کیس کی سماعت جسٹس فیصل عرب  کی سربراہی میں 3 رکنی بینچ نے کی، عدالت کو بتایا گیا کہ اسلام آباد ہائیکورٹ نے خصوصی عدالت کو کام کرنے سے روک رکھا ہے۔

استغاثہ کے وکیل طارق حسن نے مؤقف اختیار کیا کہ خصوصی عدالت نے 3 دیگر افراد کو شریک ملزم بنانے کا حکم دیا تھا، اسلام آباد ہائیکورٹ نے خصوصی عدالت کو صرف ان افراد کیخلاف کارروائی کرنے سے روکا ہے، عدالت پرویز مشرف کیخلاف کارروائی جاری رکھ سکتی ہے۔

جسٹس فیصل عرب نے ریمارکس دیئے کہ خصوصی عدالت نے 21 نومبر کے فیصلے میں شوکت عزیز، عبدالحمید ڈوگر اور زاہد حامد کو شریک ملزم بنانے کا حکم دیا تھا کیونکہ عدالت کے نزدیک 3 نومبر کا اقدام انفرادی نہیں تھا، یہ فیصلہ وفاق نے کسی جگہ چینلج کیا اور نہ ہی کسی فورم نے اس حکم کو کالعدم قرار دیا۔

ہائیکورٹ میں دائر کی گئی درخواستوں کے قابل سماعت ہونے سے متعلق فیصلہ ابھی باقی ہے، اسی لئے ہائیکورٹ نے حکومت کی رضامندی سے حکم امتناع جاری کیا تھا، عدالت نے استغاثہ کی زبانی استدعا مسترد کرتے ہوئے سماعت کسی کارروائی کے بغیر 18  فروری تک ملتوی کردی۔