نگران وزیراعلیٰ گلگت بلتستان کی تعیناتی چیلنج کرینگے: عمران خان

میڈیا سے گفتگو میں پاکستان تحریک انصاف کے چیئرمین عمران خان کا کہنا تھا کہ گلگت بلتستان کا نگران وزیراعلیٰ مسلم لیگ (ن) کا کارکن ہے۔ ان کی تعیناتی کو سپریم کورٹ میں چیلنج کرینگے۔ عمران کا کہنا تھا کہ پاکستان کی تاریخ کی سب سے بڑی دھاندلی 2013ء کے انتخابات میں ہوئی۔ الیکشن 2013ء میں ریٹرننگ افسروں کا کردار سامنے آ گیا ہے۔ انتخابات میں دھاندلی کا اصل کھیل ریٹرننگ افسروں نے کھیلا۔ تھیلوں سے تحریک انصاف کے ووٹ نکال کر مسلم لیگ (ن) کے ووٹ ڈالے گئے۔ ان کا کہنا تھا کہ اگر تحریک اںصاف دھرنا نہ دیتی تو 5 سال دھاندلی ثابت کرنے میں ہی لگ جاتے۔ دھرنے کا مقصد پاکستان کو حقیقی جمہوریت کی طرف لانا تھا۔ وقت میرے ساتھ ہے، مجھے پتا ہے آگے کیا ہونے والا ہے۔ اب تو ٹربیونل میں فیصلے ہونگے اور دودھ کا دودھ پانی کا پانی ہو جائے گا۔ الیکش کمشن نے جلد کیسز نمٹانے کی ہدایت کی ہے جس پر ہم اس کا شکریہ ادا کرتے ہیں۔ عمران خان نے کہا کہ کل کشمیر ڈے پر بیرسٹر سلطان محمود اور دیگر تحریک انصاف میں شمولیت کا اعلان کر رہے ہیں۔ –