نیشنل ایکشن پلان کے 22 اہداف حاصل کرلئے گئے، وزیراعظم کو بریفنگ

اسلام آباد : حکومت نے کہا ہے کہ قومی ایکشن پلان کے 22 اہداف حاصل کر لئے گئے ہیں، کراچی آپریشن کے دوران 35 ہزار سے زیادہ جرائم پیشہ افراد گرفتار کرلئے، جرائم کی شرح کم ہوگئی ہے۔

وزیراعظم نواز شریف کو بریفنگ میں بتایا گیا کہ قومی ایکشن پلان پر تیزی سے عملدرآمد جاری ہے، فوجی عدالتیں بن گئیں، مدارس میں اصلاحات، رجسٹریشن، آڈٹ اور غیرملکی طلبہ کی رجسٹریشن پر اتفاق رائے ہوگیا ہے، مدارس میں غیرملکی طلبہ کا داخلہ بند کردیا گیا ہے، کالعدم تحریک طالبان سے وابستہ 233 عسکریت پسندوں کی نشاندہی ہوئی جبکہ 60 تنظیموں کو کالعدم قرار دیدیا گیا۔

نیشنل ایکشن پلان کمیٹی کو بریفنگ میں مزید بتایا گیا ہے کہ فرقہ وارانہ دہشت گردی میں ملوث 294 افراد کی نشاندہی ہوئی، نفرت انگیز تقاریر پر 547  مقدمات درج کرکے 416 افراد کو گرفتار کیا گیا، نفرت انگیز مواد رکھنے پر 41 دکانیں بھی سیل کی گئیں، دہشتگردوں کی مالی معاونت پر 32 افراد کو گرفتار کرکے 26 مقدمات درج کئے گئے ہیں۔

وزیراعظم کی زیر صدارت اجلاس میں بتایا گیا ہے کہ جدید انسداد دہشت گردی فورس میں پنجاب سے 5ہزار، خیبرپختونخوا سے 3 ہزار، بلوچستان سے ایک ہزار جبکہ سندھ سے 800 جوان شامل ہوں گے، بریفنگ کے مطابق 3 کروڑ 10 لاکھ سمز کی تصدیق کی جاچکی ہے، میڈیا ہاؤسز کی سیکیورٹی کیلئے 57 گارڈز کو تربیت فراہم کی گئی، کراچی میں آپریشن سے جرائم کم ہوگئے ہیں۔