امریکی وفد کاضرب عضب میں پاک فوج کی کامیابیوں پر اطمینان

راول پنڈی : امریکی کانگریس کے وفد نے پاکستان کی جانب سے دہشت گردی کے خلاف قربانیوں کو سراہتے ہوئے پاکستان کے کردار کی تعریف کی، امریکی وفد نے شمالی وزیرستان میں دہشت گردوں کے خلاف جاری آپریشن ضرب عضب میں پاک فوج کی کامیابیوں کو بھی سراہا۔

جنرل ہیڈکواٹرز راول پنڈی میں پاک فوج کے سپہ سالار جنرل راحیل شریف سے امریکی کانگریس کے وفد نے ملاقات کی۔ ملاقات میں پاک افغان تعلقات اور  دہشت گردی کے خلاف پاکستانی اقدامات سے متعلق تبادلہ خیال کیا گیا۔ امریکی وفد کی قیادت رکن سینیٹ آرمڈ سروسز کمیٹی جیک ریڈ نے کی۔ اس موقع پر جیک ریڈ کا کہنا تھا کہ دہشت گردی کےخلاف جنگ میں پاکستان نے کئی قربانیاں دیں ہیں، جسے ہم  تسلیم کرتے ہیں۔

ملاقات میں پاک امریکا دو طرفہ  تعلقات پر بھی گفت گو کی گئی۔ ملاقات میں ڈی جی آئی ایس آئی کے دورہ کابل پر بھی بات چیت کی گئی، امریکی کانگریس کے وفد نے دہشت گردی کے خلاف پاکستان کی کوشش کو سراہتے ہوئے اسے سنجیدہ اقدامات  قرار دیا۔  جیل ریڈ کا کہنا تھا کہ دہشت گردی جیسے ناسور کو ختم کرنے کیلئے دونوں ممالک سنجیدہ ہیں۔