پی پی 97 گجرانوالہ میں ضمنی انتخابات کا عمل جاری

گجرانوالہ: الیکشن ٹربیونل پنجاب کے حکم پرصوبائی حلقہ پی پی97 گوجرانوالہ کے 33پولنگ اسٹیشنوں پر آج دوبارہ انتخابات ہورہے ہیں۔

پی پی 97 میں ہونے والے الیکشن میں مسلم لیگ(ن) کے امیدواراشرف وڑائچ اورتحریک انصاف کے حمایت یافتہ امیدوارناصرچیمہ کے درمیان مقابلہ ہوگا۔

اس نشست پر2013 کے الیکشن میں مسلم لیگ ن کے اشرف وڑائچ کامیاب ہوئے تھے تاہم مسلم لیگ ق کے امیدوارناصرچیمہ نے دھاندلی کا الزام عائد کیا اورالیکشن ٹربیونل میں رٹ دائرکی۔

الیکشن ٹربیونل کے جسٹس کاظم علی ملک نے 33 پولنگ اسٹیشنوں پر دوبارہ الیکشن کروانے کا حکم جاری کیا تھا۔

ناصر چیمہ مسلم لیگ ق کو چھوڑ کرتحریک انصاف میں شمولیت اختیار کرچکے ہیں اور پی ٹی آئی نے انہیں اپنا امیدوارنامزد کیا ہے، تاہم ان کا انتخابی نشان سائیکل ہی ہے۔

ناصر چیمہ کو پی ٹی آئی، پیپلزپارٹی، جماعت اسلامی، چٹھہ لیگ اورسنی تحریک کی حمایت حاصل ہےجبکہ مسلم لیگ ن کے امیدواراشرف وڑائچ کے حق میں اس حلقے سے دوسرے نمبر پررہنے والے امیدوارڈاکٹرمیاں غلام سروردستبردارہوچکے ہیں۔

33پولنگ اسٹیشنوں پرہونے والی پولنگ کے لیے 52ہزار550 ووٹرزاپنا حق رائے دہی استعمال کریں گے۔ جن میں30ہزار798مرداور21ہزار552خواتین ووٹرزشامل ہیں۔