بجلی لوڈ شیڈنگ کیخلاف اپوزیشن کا قومی اسمبلی سے واک آئوٹ

لوڈ شیڈنگ کا واویلا اب اسمبلی کے ایوانوں میں بھی شد و مد سے سنائی دیا جا رہا ہے ۔ آج بجلی کی لوڈشیڈنگ کے خلاف اپوزیشن نے قومی اسمبلی سے واک آؤٹ کیا ۔ واک آؤٹ کے بعد پارلیمنٹ کے باہر میڈیا سے بات کرتے ہوئے اپوزیشن لیڈر خورشید شاہ نے کہا لوڈ شیڈنگ کے باعث لوگ مر رہے ہیں۔ تحریک انصاف کے شاہ محمود قریشی نے کہا پاکستان کی تاریخ میں پہلی مرتبہ گرمی کی وجہ سے 150 کے قریب اموات ہوئیں ۔ ایم کیو ایم کے رہنما رشید گوڈیل نے کہا عوام کی تکالیف کی کوئی شنوائی نہیں ہے ، شکایت کریں تو جواب ملتا ہے کے الیکٹرک پرائیویٹ ہو چکا ہے ۔ آفتاب شیر پاؤ کا کہنا تھا کہ شب قدر کی مسجد میں لوگوں نے آزانیں دینا شروع کر دی ہیں کہ بجلی کی لوڈ شیڈنگ کے خلاف باہر نکلو ۔ عوامی مسلم لیگ کے سربراہ شیخ رشید نے وزیر خزانہ اسحاق ڈار کو مشورہ دے ڈالا کہ ترقیاتی منصوبوں کو ختم کر کے سارے فنڈز بجلی پر خرچ کیے جائیں ۔ اس سے پہلے جماعت اسلامی کے ارکان پلے کارڈ اٹھا کر ایوان میں پہنچ گئے اور کھڑے ہو کر لوڈ شیڈنگ بند کرو ، عوام پر رحم کرو کے نعرے لگانا شروع کر دیئے۔