محکمہ موسمیات کے مطابق شوال کا چاند 24 جون کی صبح 7 بج کر 31 منٹ پر پیدا ہو جائے گا اور رمضان کی 29 تاریخ یعنی 25 جون کی شام واضح طور پر دکھائی دے گا۔ عید الفطر کا چاند ملک کے زیادہ تر علاقوں میں دکھائی دے گا تاہم موسم کافی یا جزوی ابر آلود ہو گا۔ خیال رہے کہ پشاور کی مسجد قاسم کے مفتی شہاب الدین پوپلزئی سمیت دیگر علمائے کرام کی جانب سے چاند کی شہادت کے آزاد اعلانات کے بعد پیدا ہونے والے تنازع سے نمٹنے کے لیے وزارت مذہبی امور نے رواں سال مرکزی رویت ہلال کمیٹی کا اجلاس پشاور میں کرنے کا فیصلہ کیا ہے۔ اس حوالے سے وزارت مذہبی امور سردار محمد یوسف کا حال ہی میں کہنا تھا کہ ہم مفتی پوپلزئی کو اجلاس میں مدعو کریں گے اور توقع کی جا رہی ہے کہ اگر وہ خود نہیں آتے تو اپنا نمائندہ بھیج دیں گے۔