چینی جوڑے کا قتل حقیقت یا افسانہ ، اداروں کی ہر پہلو سے تفتیش

کوئٹہ سے چینی جوڑے کے اغوا کے واقعہ سے متعلق مزید شواہد سامنے آگئے ۔ وزراتِ داخلہ نے اردو اکیڈمی کے مالک جنوبی کوریا کے باشندے کا ویزا منسوخ کر دیا ۔ ذرائع وزارت داخلہ کے مطابق تحقیقات میں یہ بات سامنے آئی ہے کہ کورین باشندہ جوآن وان سیو عرف گلبرٹ بزنس ویزے پر پاکستان آیا لیکن یہاں اس نے اردو اکیڈمی قائم کرلی، یہ غیر قانونی سرگرمیوں میں ملوث تھا، یہ بات بھی سامنے آئی ہے کہ کچھ عرصہ قبل چینی باشندوں کو خروٹ آباد کے علاقے سے بھی پولیس نے اپنی تحویل میں لیا اور انہیں سیکیورٹی کے حوالے سے نہ صرف خبردار کیا بلکہ انہیں سیکیورٹی فراہم کرنے کی پیشکش کی گئی، تاہم انہوں نے سیکیو رٹی قبول کرنے سے انکار کر دیا ۔ سیکیورٹی اور انٹیلی جنس ادارے اس تمام واقعہ کے پس منظر اور سوشل میڈیا پر جاری کی گئی اغواشدگان کی تصاویر کا بغور جائزہ لے رہے ہیں تاکہ کسی حتمی نتیجے پر پہنچا جا سکے اور اس بات کی بھی تصدیق کی جا سکے کہ آیا دونوں چینی باشندے واقعی قتل کئے گئے ہیں یا نہیں۔