کراچی میں شہید پولیس اہلکاروں کی نماز جنازہ ادا کر دی گئی

کراچی کے علاقے سائٹ تھانہ کی حدود میں نامعلوم دہشت گردوں کی فائرنگ سے شہید چاروں پولیس اہلکاروں کی نماز جنازہ گارڈن ہیڈ کوارٹر میں ادا کردی گئی ہے۔ ترجمان سندھ پولیس کے دفتر سے جاری ایک اعلامیئے کے مطابق سائٹ تھانہ کی حدود سیمینس اور حبیب چورنگی کے قریب دوران روزہ افطار نامعلوم دہشت گردوں کی فائرنگ سے شہید ہونیوالے اے ایس آئی محمد یوسف، کانسٹیبلز شبیر، خالد اور اسرار کی نماز جنازہ پولیس ہیڈ کوارٹرز گارڈن میں ادا کردی گئی، اس موقع پر پولیس کے خصوصی دستے نے شہید اہلکاروں کو سلامی پیش کی اور پھولوں کی چادر چڑھائی۔ شہید ہونے والے اہلکاروں کی نماز جنازہ میں سینئر صوبائی وزیرمنظوروسان، آئی جی سندھ اے ڈی خواجہ، ڈی جی رینجرز سندھ میجر جنرل محمد سعید، ایڈیشنل آئی جی کراچی مشتاق احمد مہر، ایڈیشنل آئی جی سی ٹی ڈی ڈاکٹرثناءاللہ عباسی، ایڈیشنل آئی جی سندھ آفتاب پٹھان، ایڈیشنل آئی جی اسپیشل برانچ ڈاکٹر ولی اللہ دل، ویسٹ ساؤتھ ایسٹ زونز کے ڈی آئی جیز، ایس ایس پیز، اے آئی جی آپریشنز سندھ سمیت شہدائے پولیس کے ورثاء دوست احباب ساتھی پولیس افسران جوان اور اہلیان علاقہ نے کثیر تعداد میں شرکت کی۔ آئی جی سندھ اے ڈی خواجہ نے کہا کہ جرائم سے برسرپیکار پولیس افسران اور جوانوں کے عزائم اور حوصلوں کو ہرگز پست نہیں کیا جاسکتا اور اگر دہشت گرد ایسا سنجھتے ہیں کہ انکے گھناؤنے ہتھکنڈوں اور دہشت گردانہ حملوں سے پولیس پیچھے ہٹ جائیگی تو یہ انکی بھول ہے۔عوام کی جان ومال کی سلامتی کی خاطر پولیس کی قربانیاں رائیگاں نہیں جائیں گی پولیس کا ہر افسر اور جوان دہشت گردوں کے سامنے سیسہ پلائی ہوئی دیوار کی مانند ڈھال بن کر انکے مذموم مقاصد اورعزائم کو خاک میں ملانے کے لیئے ہمہ وقت الرٹ اور تیار ہے۔ اس موقع پر آئی جی سندھ نے شہدائے پولیس کے قانونی ورثاء کے لیئے پچاس پچاس لاکھ روپے کی امداد، قانونی ورثاء کو محکمہ پولیس میں ایک ملازمت، شہید اہلکاروں کے قانونی ورثاء کو ریٹائرمنٹ کی عمر تک ماہانہ تنخواہ اور دیگر مروجہ مراعات دینے کا اعلان کیا اور اس حوالے سے تمام ترضروری قانونی دستاویزی امورجلد سے جلد مکمل کرنیکے متعلقہ پولیس افسران کو مکمل کر کے برائے ملاحظہ ارسال کرنیکے احکامات دیئے۔