رواں صدی کے وسط تک پاکستان میں پانی کی شدید قلت پیدا ہونے کا خدشہ

رواں صدی کے وسط تک پاکستان میں پانی کی شدید قلت پیدا ہو جانے کا خدشہ ہے۔ بین الاقوامی جریدہ واشنگٹن پوسٹ کہتا ہے کہ بھارت کے ساتھ پانی کا مسئلہ مودی دور میں مزید شدت اختیار کرسکتا ہے۔ بین الاقوامی جریدے واشنگٹن پوسٹ کے مطابق پاکستانی یہ سمجھتے ہیں کہ بھارت کی جانب سے دریاوں پر ڈیم کی تعمیر سے پاکستان کا پانی رک رہا ہے، یہ اقدام 1960 کے سندھ طاس معاہدے کی بھی خلاف ورزی ہے اس کے علاوہ رپورٹ میں بتایا گیا ہے کہ ناقص پالیسیاں اور حکومت کی غفلت بھی آبی مسائل کی جڑ ہیں جہاں پاکستان میں دریاوں کے پانی کا رخ شہروں کی طرف کیا جا رہا ہے، وہاں دوسری جانب فصلوں کی آبیاری میں بہت سا پانی ضائع کر دیا جاتا ہے۔ اس کے علاوہ ماہرین کہتے ہیں کہ بارش کا پانی محفوظ ہونے کے بجائے ریلے کی شکل میں فصلوں کو تباہ کرتا ہوا سمندر میں چلا جاتا ہے۔