‘کشمیر میں انسانی حقوق کی بدترین کارروائیوں پر دنیا کی خاموشی افسوسناک ہے’

مقبوضہ کشمیر میں بڑھتی ہوئی شہادتوں پر پاکستان کی جانب سے سخت نوٹس لیا گیا ہے۔ ترجمان دفتر خارجہ نفیس زکریا نے کہا ہے کہ انسانی حقوق کی بدترین کارروائیوں پر دنیا کی خاموشی افسوسناک ہے، مقبوضہ وادی میں تشدد اور قتل و غارت عالمی برادری کی آنکھیں کھولنے کیلئے کافی ہے، کشمیریوں کو حق خود ارادیت دینے کی بجائے ان کے سینے چھلنی کئے جا رہے ہیں۔ نفیس زکریا نے کہا کہ آزادی کی تحریکیں جبر و تشدد سے دبتی نہیں ابھرتی ہیں، کشمیریوں نے اپنے خون سے حق خود ارادیت کی تحریک کو زندہ رکھا ہے، بھارت غاصب کے طور پر کشمیر پر اپنا تسلط قائم رکھنا چاہتا ہے، کشمیریوں نے قربانیوں کی تاریخ رقم کر کے ثابت کیا کہ وہ آزادی کے سوا کچھ نہیں چاہتے۔ ترجمان دفترخارجہ کا مزید کہنا تھا کہ کشمیریوں کی نسل کشی بھارت کو مہنگی پڑے گی، بھارت نوشتہ دیوار پڑھ لے کشمیری بچے اور بچیاں بھی میدان میں آ گے ہیں۔