معین علی سعید اجمل کی واپسی کے لئے پُراُمید

پاکستانی ٹیم کے اسپن بولنگ کے بادشاہ 37 سالہ سعید اجمل بولنگ ایکشن کی تبدیلی کے بعد ان دنوں اپنی بہتر کارکردگی پیش کرنے کی کوششوں میں مصروف ہیں۔

ووسٹرشائر کی جانب سے کھیلتے ہوئے گذشتہ ہفتے سیعد اجمل نے نورتھاپٹنشائر کے خلاف اپنے پہلے میچ میں 53 رنز دے کر 3 کھلاڑیوں کو آؤٹ کیا اور اسی ٹیم کے خلاف ہونے والے دوسرے میچ میں 26 رنز دے کر 2 کھلاڑیوں کو پویلین کی راہ دکھائی۔

معین علی نے کہا ہے کہ پاکستانی اسپنر نے یہ دکھا دیا ہے کہ وہ کامیابی کی جانب واپس آرہے ہیں۔

انھوں نے ووسٹرشائر کرکٹ کلب کی ویب سائیٹ سے بات چیت کرتے ہوئے کہا کہ ’سعید اجمل کی واپسی بہت اچھی بات ہے اور میں اس بات پر یقین رکھتا ہوں کے وہ اب بھی دنیا کے بہترین اسپنر ہیں‘۔

ان کا کہنا تھا کہ سعید اجمل کے ایکشن میں تبدیلی آئی ہے تاہم کچھ ہی روز میں ان کی کارکردگی میں بہتری آرہی ہے۔

معین نے کہا کہ سعید کو ’ایک اچھا چار روزہ میچ مل جائے‘ تو ان کی فارم بحال ہوجائے گی۔

انگلینڈ کی نمائندگی کرنے والے 27 سالہ کرکٹر جو کہ آف اسپن باؤلنگ بھی کرلیتے ہیں، کا کہنا ہے کہ سعید کی کرکٹ میں واپسی نے ان کو حیران نہیں کیا حالانکہ متعدد حلقوں کا خیال تھا کہ ان کا کریئر ختم ہوچکا ہے۔

’ہم سب جانتے ہیں کہ وہ کتنے اچھے ہیں۔ اگر سعید بہترین کارکردگی دکھاتے ہیں تو میرے لیے یہ کوئی حیران کن بات نہیں ہوگی کیونکہ انہوں نے نئے ایکشن کو اپنانے کے لئے بہت سخت محنت کی ہے‘۔

ووسٹرشائر کے ڈائریکٹر سٹیو روڈس کا کہنا ہے کہ معین علی کی مدد سے سعید کاؤنٹی کرکٹ کے دوران فارم بحال کرسکتے ہیں۔

سعید ماضی میں انکشاف کرچکے ہیں کہ انہوں نے اپنے ‘خفیہ ہتھیار’ معین کے ساتھ شیئر کیے ہیں۔

انہوں نے مزید کہا کہ سعید اجمل اسپن باؤلنگ کے حوالے سے اپنے خیالات چھپاتے نہیں ہیں جو کہ معین کے لیے ایک اچھی بات ہی ہوسکتی ہے۔