اسرائیلی فوج کے ہاتھوں رواں سال 11 فلسطینی قتل

فلسطین کے سیکیورٹی ذرائع کے مطابق اسرائیلی فوج کی جانب سے آج صبح فلسطین کے کفر مالک نامی گاؤں میں سرچ آپریشن کا آغاز کیا گیا تھا جس کے خلاف فلسطینیوں کی مقامی آبادی کی جانب سے احتجاج کیا گیا۔ اس احتجاج کے دوران اسرائیلی فوج سے ہونے والی جھڑپ میں 21 سالہ عبداللہ غنائم ہلاک ہوگیا۔

اسرائیلی فوج کے ترجمان نے غیر ملکی خبررساں ادارے اے پی پی کو بتایا ہے کہ فلسطینیوں کی جانب سے فوجی گاڑی پر آتش گیر مادے سے حملہ کیا گیا تھا، جس کے باعث فوجی گاڑی الٹ گئی اور فلسطینی نوجوان اس کے نیچے دب کر ہلاک ہوگیا۔

یاد رہے کہ رواں ہفتے کے آغاز پر مغربی کنارے میں ہی قائم ایک مہاجرین کے کیمپ میں اسرائیلی فوج اور فلسیطنیوں کے درمیان ہونے والی جھڑپ کے دوران ایک فلسطینی شہری کو اسرائیلی فوج نے گولی مار کر ہلاک کردیا تھا۔

اسرائیل اور فلسطین کے درمیان جاری کشیدہ صورت حال کے حوالے سے اقوام متحدہ نے اپنی ایک روپوٹ میں کہا ہے کہ رواں سال میں اب تک فلسطین کے مغربی کنارے میں اسرائیلی فوج کے ہاتھوں 11 فلسطینی شہری ہلاک ہوچکے ہیں۔