لاہور ہائیکورٹ نے الطاف حسین کی تقاریر نشر کرنے پر پابندی لگا دی، شہریت کا ریکارڈ طلب

متحدہ کے قائد الطاف حسین کے خلاف آرٹیکل چھ کے تحت کارروائی کے لیے دائر درخواست کی سماعت کے دوران فل بنچ نے الطاف حسین کی تقاریر پر پابندی عائد کر دی اور حکومت سے ان کی شہریت کا تمام ریکارڈ طلب کرلیا ہے۔ عدالت کی جانب سے متعلقہ سرکاری اداروں سے بھی جواب طلب کر لیا گیا ہے ۔

درخواست گزار آفتاب ورک کی جانب سے درخواست ہائیکورٹ میں دائر کی گئی جس میں موقف اختیار کیا گیا کہ الطاف حسین نے ملک اور پاک فوج کے خلاف بیان بازی کی۔

اس معاملے پر وفاقی حکومت ، وزارت خارجہ اور وزرات اطلاعات نے نوٹس نہیں لیا ، الطاف حسین کے خلاف آرٹیکل چھ کے تحت کارروائی کا حکم دیا جائے۔

لاہور ہائیکورٹ میں چار درخواست گزاروں نے الطاف حسین کے خلاف غداری کا مقدمہ چلانے کی درخواستیں کی تھیں جس پر عدالت نے مختصر فیصلہ سنایا ہے۔