وزیر داخلہ چودھری نثار کی وزیر اعظم سے ملاقات ، دورہ برطانیہ پر بریفنگ

وفاقی وزیر داخلہ چوہدری نثار علی خان نے وزیر اعظم میاں محمد نواز شریف سے ملاقات کی اور اپنے دورہ برطانیہ کے حوالے سے تفصیلی بریفنگ دی ، ملکی سیکیورٹی صورتحال پر بھی تبادلہ خیال کیا گیا۔

جمعہ کے روز وفاقی وزیر داخلہ چوہدری نثار علی خان نے اسلام آباد میں وزیراعظم ہاﺅس میں وزیراعظم میاں محمد نواز شریف سے ملاقات کی اور اپنے دورہ برطانیہ کے حوالے سے وزیر اعظم کو آگاہ کیا۔ اس حوالے سے چودھری نثار نے عمران فاروق قتل کیس سمیت منی لانڈرنگ کے برطانیہ کے ساتھ معاملات پر نواز شریف کو بریفنگ دی۔

چوہدری نثار نے وزیر اعظم کو بتایا کہ عمران فاروق قتل کیس سے متعلق برطانیہ کے تحقیقاتی ادارے سکاٹ لینڈ یارڈ کے حکام کو ملزم محسن علی تک رسائی دینے کے حوالے سے برطانوی حکام سے تفصیلی بات چیت ہوئی جس میں جلد ہی اچھے نتائج ملنے کی توقع ہے۔

برطانوی حکام سے منی لانڈرنگ کے معاملات پر بھی بات چیت ہوئی اور اس حوالے سے اہم پیش رفت ہو رہی ہیں۔ ملاقات میں ملکی سیکیورٹی صورتحال پر بھی تفصیلی گفتگو ہوئی اور اس حوالے سے چوہدری نثار علی خان نے وزیر اعظم کو قومی ایکشن پلان کو مزید تیز کرنے اور اس کے حاصل کردہ نتائج کے بارے میں وزیراعظم کو آگاہ کیا۔

وزیر اعظم نے قومی ایکشن پلان پر مزید کام تیز کرنے کی ہدایت دیتے ہوئے کہا کہ ملک بھر میں دہشتگردوں اور ان کے سہولت کاروں کے خلاف موثر کارروائی کی جائے تاکہ ملک کا امن مکمل طور پر بحال ہو سکے اور دہشتگردی کے خاتمے سے ہی امن ہو سکتا ہے اور دہشتگردی ہی ترقی کی راہ میں سب سے بڑی رکاوٹ ہے۔