ملک بھر میں ذی الحج کا چاند نظر نہیں آیا، عید الاضحیٰ 25 ستمبر کو ہو گی

پاکستان میں ذی الحج کا چاند دیکھنے کے لیے مرکزی رویت ہلال کمیٹی کا اجلاس مفتی منیب الرحمان کی سربراہی میں کراچی میں ہوا جس میں دیگر مکاتب فکر سے تعلق رکھنے والے علمائے کرام اور ماہر فلکیات نے بھی شرکت کی جبکہ اس کے علاوہ ملک کے دیگر شہروں لاہور، پشاور اسلام آباد میں بھی چاند دیکھنے کے لیے زونل کمیٹیوں کے اجلاس ہوئے جہاں ملک کے کسی بھی حصے سے چاند نظر آنے کی کوئی شہادت موصول نہیں ہوئی جس کے بعد زونل کمیٹیوںنے چاند کی شہادتوں سے متعلق مرکزی کمیٹی کو آگاہ کیا۔

چیرمین مرکزی رویت ہلال کمیٹی مفتی منیب الرحمان نے پریس کانفرنس کے دوران ملک بھر میں ذی الحج کا چاند نظر نہ آنے کا اعلان کرتے ہوئے بتایا کہ پاکستان میں یکم ذی الحج 15 ستمبر جبکہ عید الاضحیٰ 25 ستمبر بروز جمعہ کو ہو گی۔ واضح رہے گزشتہ روز سعودی عرب اور دیگر خلیجی ممالک میں بھی ذالحج کا چاند نظر نہیں آیا تھا اور 24 ستمبر کو عید الاضحیٰ منانے کا فیصلہ کیا گیا۔ سعودی سپریم کورٹ کے اعلان کے مطابق آج 14 ستمبر اسلامی مہینے ذی العقد کا آخری دن ہے جبکہ کل 15 ستمبر 2015ء قمری مہینے ذالحج کا پہلا دن ہو گا۔ یوم عرفات 23 ستمبر کو ہو گا۔