انتخابی مہم میں حصہ لینے پر پابندی کیخلاف الیکشن کمیشن اورعدالت جاؤں گا،عمران خان

لاہورمیں پریس کانفرنس کے دوران عمران خان نے کہا کہ الیکشن کمیشن ارکان قومی و صوبائی اسمبلی کو ضمنی انتخابات کی مہم میں حصہ لینے نہیں دے رہا، وہ کوئی وزیر نہیں ، نا ہی ان کے پاس کوئی فنڈز ہیں، وہ ایک سیاسی جماعت کے سربراہ ہیں، پھر بھی انہیں اپنا پارٹی منشور عوام کے پاس لے جانے نہیں دیا جارہا۔ جس پر وہ الیکشن کمیشن میں پٹیشن جمع کرائیں گے۔ الیکشن کمیشن کے خلاف 4 اکتوبر کو اسلام آباد میں بڑاجلسہ کریں گے۔

چیئرمین تحریک انصاف کا کہنا تھا کہ 2013 کے عام انتخابات میں این اے 122 میں سب کو پتہ ہے کہ کیا ہواتھا، این اے122میں ایک لاکھ 84 ہزار میں سے 53 ہزار ووٹ غیر قانونی تھے، کیا ایک حلقے میں 53 ہزار غلطیاں ہوسکتی ہیں، الیکشن کمیشن اس کے ذمہ داروں کے خلاف کچھ نہیں کرے گا کیونکہ 2013میں الیکشن کمیشن مسلم لیگ (ن) کے ساتھ ملاہوا تھا، دھاندلی کرنے والوں کوبڑے بڑے عہدے دیئےگئے، پنجاب میں آج بھی وہی الیکشن کمیشن ہے جس نے تاریخی دھاندلی کی، پنجاب کا الیکشن کمیشن مسلم لیگ (ن) کو جتوانے کی کوشش کرے گا،این اے122اور 154 میں ان پر پابندی عدالت نہیں الیکشن کمیشن نے لگائی ہے لیکن یہ 2013 کا نہیں 2015 کاالیکشن ہے۔ ہم بھرپور طاقت سے ضمنی انتخابات لڑیں گے۔

عمران خان نے کہا کہ وہ جمہوریت اوراداروں پر یقین رکھتے ہیں، آصف زرداری کا آج کل غصہ ٹھیک ہے، قوم فوج اوررینجرز کے ساتھ کھڑی ہے لیکن احتساب فوج کا کام نہیں، اس کے لئے آزاد اور خود مختار نیب بنایا جائے، پاکستان میں آزاد اور خودمختار نیب بنانے کا وقت آگیا ہے، بتایا جائے کہ 15 ارب روپے کے دانش اسکول کہاں گئے، 30 ارب روپے کی سستی روٹی کون کھا گیا، لوہے کا کاروبار کرنے والوں نے ہرجگہ لوہا لگا دیا اور پاکستان اسٹیل ملز جان بوجھ کر بند کردی گئی، قائداعظم سولر پاورمیں بھی بڑے پیمانے پرفراڈ کیا گیا، میٹرو بس 3 ارب روپے سالانہ کا نقصان کرے گی، ہم ضمنی الیکشن کی مہم میں نندی پور اور میٹرو سمیت حکمرانوں کی کرپشن سامنے لائیں گے۔

چیئرمین تحریک انصاف کا کہنا تھا کہ لاہورمیں تحریک انصاف کو انتخابی مہم سے روکا جارہا ہے، مسلم لیگ (ن) کے لوگ پولیس کے ذریعے ہمارے کارکنوں کو ڈرا رہے ہیں، پولیس میں بھرتی کئے گئےگلوؤں کو عوام کے سامنے لائیں گے۔