منیٰ میں بھگدڑ سے شہید ایک اور پاکستانی کی تصدیق، تعداد 9 ہوگئی

دو روز قبل منیٰ میں بھگدڑ کے نتیجے میں شہید ہونے والوں میں 7 سالہ پاکستانی بچی ثمرین بھی شامل ہے جس کا تعلق ملتان سے ہے، ثمرین کی شہادت کی تصدیق کے بعد اس سانحے میں شہید ہونے والے پاکستانیوں کی تعداد 9 ہوگئی ہے جب کہ 311 پاکستانی اب بھی لاپتا ہے۔

شہید پاکستانیوں میں کراچی کے علاقے صدر کی حفصہ شعیب اور زرین نسیم، میر پور آزاد کشمیر کی نرجس شہناز، دالبندین کی بی بی زینب، بی بی مدینہ، نور محمد اور محمد اسلم کے علاوہ سابق وزیر اعظم یوسف رضا گیلانی کے بھانجے اسد مرتضیٰ گیلانی شامل ہیں۔

سعودی عرب میں پاکستانی سفارت خانے کے مطابق سعودی حکومت نے سرکاری طور پر شہدا اور زخمیوں کی کوئی فہرست جاری نہیں کی۔ اس حوالے سے سعودی انتظامیہ سے رابطے میں ہیں۔ پاکستانی شہریوں کی شناخت کے بعد ان کی مکہ مکرمہ میں ہی تدفین کی جائے گی۔

دوسری جانب سعودی حکام نے سانحہ منیٰ کے 717 شہدا میں سے 500 کی تصاویر دنیا بھر کے حج مشنز کے حوالے کردی ہیں تاہم ان میں کسی کی بھی شناخت یا قومیت ظاہر نہیں کی گئی۔