‘پاکستان میں دہشت گردوں کو ہندوستانی معاونت’

ہندوستانی وزیر خارجہ سشما سوراج کی جانب سے اقوام متحدہ کی جنرل اسمبلی میں خطاب کے دوران پاکستان پر لگائے گئے الزامات کے جواب میں پاکستانی مشیر خارجہ سرتاج عزیز نے پریس کانفرنس کرتے ہوئے کہا کہ دہشت گردی میں ہندوستان کے ملوث ہونے کے تمام ثبوت اقوام متحدہ کو فراہم کر دئیے ہیں۔

انہوں نے بتایا کہ پاکستان کی جانب سے اقوام متحدہ کے لئے مستقل مندوب ڈاکٹر ملیحہ لودھی نے سیکرٹری جنرل کے آفس میں اقوام متحدہ کے سیکرٹری جنرل بان کی مون کو ڈوزئیر پیش کیا۔

ان کا کہنا تھا کہ پاکستان مذاکرات کے لیے تیار ہیں جبکہ ہندوستان مذاکرات سے ہمیشہ بھاگتا رہا ہے۔

مشیر خارجہ سرتاج عزیز نے کہا کہ اُنہوں نے 15 ممالک کے وزرائے خارجہ سے ملاقات کی اور انھیں ہندوستانی ہٹ دھرمی سے آگاہ کیا ہے۔

مشیر خارجہ کا کہنا تھا کہ ہندوستان نے آج تک ممبئی حملوں کے حوالے سے پاکستان کو کوئی ثبوت پیش نہیں کئے جبکہ سمجھوتہ ایکسپریس پر پاکستان نے تمام ثبوت ہندوستانی حکومت کو فراہم کئے تھے لیکن اس پر آج تک کوئی پیش رفت نہیں کی گئی۔