پاکستان تحریکِ انصاف (پی ٹی آئی) کے چیئرمین بیرسٹر گوہر خان نے کہا ہے کہ عمران خان نے آرمی چیف کو خط لکھ کر پالیسیاں تبدیل کرنے پر زور دیا ہے۔ پیر کو صحافیوں سے گفتگو کرتے ہوئے بیرسٹر گوہر خان کا کہنا تھا کہ منگل کو عمران خان کا خط منظرِ عام پر آ جائے گا۔
بیرسٹر گوہر خان کا کہنا تھا کہ عمران خان نے آرمی چیف کے نام اپنے خط میں فوج اور اسٹیبلشمنٹ کے درمیان دوریوں کی وجوہات کی تفصیل سے نشان دہی کی ہے۔بیرسٹر گوہر کا کہنا تھا کہ عمران خان کے نزدیک اسٹیبلشمنٹ اور عوام کے درمیان دوریوں کی بنیادی وجہ 2024 کے “دھاندلی زدہ” انتخابات ہیں
اُن کے بقول دوسری وجہ 26 ویں آئینی ترمیمی کی منظوری ہے جس سے عدلیہ کو “کنٹرول” کیا جا رہا ہے۔ واضح رہے کہ الیکشن کمیشن آف پاکستان اور حکومت انتخابات میں دھاندلی کے الزامات کی تردید کرتے ہیں۔ حکومت 26 ویں آئینی ترمیم کا بھی دفاع کرتی ہے اور اس کا دعویٰ ہے کہ عدلیہ مکمل آزاد ہے۔
