وزیرِ اعظم محمد شہباز شریف کا دورہء آذربائیجان*وزیرِ اعظم محمد شہباز شریف باکو، آذربائیجان میں کانفرنس آف پارٹیز (COP-29) کے کلائیمیٹ ایکشن سربراہی اجلاس کی افتتاحی تقریب میں شرکت کیلئے پہنچے جہاں سیکریٹری جنرل اقوام متحدہ انتونیو گوتریس اور آذربائیجان کے صدر الہام علیوف نے وزیرِاعظم کا استقبال کیا. وزیرِ اعظم کاپ-29 کے کلائمیٹ ایکشن سربراہی اجلاس کی فیملی فوٹو میں بھی شریک ہونے کے ساتھ ساتھ اجلاس کی افتتاحی تقریب میں بھی شریک ہوئے جس میں آذربائیجان کے صدر اور اقوام متحدہ کے سیکریٹری جنرل نے خطاب کیا.وزیرِ اعظم باکو میں منعقدہ کاپ-29 کے کلائیمیٹ ایکشن سربراہی اجلاس میں پاکستان کو موسمیاتی تبدیلی سے درپیش خطرات پر روشنی ڈالیں گے. وزیرِ اعظم ایسے ترقی پذیر ممالک بالخصوص پاکستان جو ہر سال موسمیاتی تبدیلی کی وجہ سے قدرتی آفات کی لپیٹ میں آکر جانی و مالی نقصانات اٹھاتے ہیں، کے لئے آواز بلند کریں گے. وزیرِ اعظم کاپ-29 کے کلائیمیٹ ایکشن سربراہی اجلاس میں سیلاب کی تباہ کاریوں سے متاثر ہونے والے لاکھوں پاکستانیوں کا مقدمہ لڑیں گے اور دنیا کو باور کرائیں گے کہ پاکستان جس کا آلودگی پھیلانے والی گیسوں کے اخراج میں حصہ نہ ہونے کے برابر ہے، مشکل معاشی حالات کے ساتھ ساتھ موسمیاتی تبدیلی کے مضر اثرات سے نبرد آزما ہو رہا ہے. وزیرِ اعظم عالمی رہنماؤں بالخصوص ترقی یافتہ ممالک کو ان کی موسمیاتی تبدیلی کے حوالے سے ذمہ داری قبول کرنے اور ترقی پذیر ممالک کی ان چیلنجز سے نمٹنے میں مدد فراہم کرنے پر زور دیں گے.وزیرِ اعظم کی اس موقع پر عالمی رہنماؤں سے غیر رسمی ملاقاتیں بھی ہوئیں. وزیرِ اعظم کی برطانیہ کے وزیرِ اعظم سر کیئر اسٹارمر (Sir Keir Starmer) سے ملاقات ہوئی، ملاقات میں دونوں رہنماؤں نے پاکستان برطانیہ تعاون کے فروغ کے حوالے سے گفتگو کی.وزیرِ اعظم کی قزاقستان کے صدر قاسم جومارت توکایف سے بھی ملاقات ہوئی. ملاقات میں پاکستان قزاقستان تعلقات کے فروغ اور علاقائی روابط میں وسعت کے حوالے سے گفتگو ہوئی.
