وفاقی وزیرِ خزانہ محمد اورنگزیب نے کہا ہے کہ حکومت نے ڈیڑھ لاکھ خالی آسامیاں ختم کرنے کا فیصلہ کیا ہے۔ اسلام آباد میں پریس کانفرنس کرتے ہوئے انہوں نے کہا کہ کلیننگ، پلمبنگ، گارڈننگ جیسی آسامیوں کو آؤٹ سورس کیا جائے گا۔ محمد اورنگزیب کا کہنا تھا کہ حکومت نے پہلے مرحلے میں وزارتِ امورِ کشمیر و گلگت بلتستان، سرحدی امور، آئی ٹی اینڈ ٹیلی کام، صنعت و پیداوار، کیڈ اور وزارتِ صحت کے معاملات کا جائزہ لیا۔ ان کے بقول دو وزارتوں کو ضم کرنے کا فیصلہ کیا گیا جن میں وزارتِ امورِ کشمیر و گلگت بلتستان اور وزارتِ سرحدی امور شامل ہیں جب کہ کیپٹل ایڈمنسٹریشن اینڈ ڈویلپمنٹ ڈویژن کو ختم کر دیا گیا ہے۔
