اسپیکر قومی اسمبلی سردار ایاز صادق نے کہا ہے کہ یہ حقیقت ہے کہ بجلی کی قیمتوں سے اس وقت عوام پریشان ہیں،دنیا بھر کو بجلی کی قیمتوں کی وجہ سے مسائل کا سامنا ہے،آئی پی پیز کے قیام کے وقت ڈالر کی قیمت انتہائی کم تھی، ڈالر کی قیمت میں اضافے سے بجلی کی قیمتوں میں بھی اضافہ ہوا ہے، بجلی کی لوڈ شیڈنگ پر کافی حد تک قابو پا لیا گیا ہے۔اسلام آباد میں بجلی کی تقسیم کے نظام پر منعقدہ مشاورتی اجلاس کے شرکا سے خطاب کرتے ہوئے اسپیکر قومی اسمبلی نے کہا کہ تیل کی عالمی مارکیٹ میں بڑھتی ہوئی قیمتیں بھی مہنگی بجلی کی وجہ ہے، ہمیں توانائی کے متبادل ذرائع کو اپنانا ہو گا،شمسی توانائی سستی بجلی کے حصول کا اہم ذریعہ ہے، ماحول دوست توانائی کا فروغ وقت کا تقاضہ ہے۔انھوں نے کہا کہ پاکستان کی پارلیمان دنیا کی پہلی پارلیمان ہے جو گرین انرجی پر منتقل کی گئی ہے،ملک کے مختلف علاقوں میں سپلائی کی جانے والی بجلی کی ریکوری 50 فیصد سے بھی کم ہے،ریکوری میں کمی کی وجہ سے بجلی کے صارفین کو دوسرں کا بوجھ بھی اٹھانا پڑتا ہے،موسم سرما میں بجلی کی کھپت میں کمی کی وجہ بجلی کی پیداوار میں کمی لانا پڑتی ہے۔اسپیکر قومی اسمبلی نے کہا کہ موجودہ پارلیمان ملکی معیشت اور توانائی کے شعبے میں درپیش چیلنجزز کے حل کیلئے کوشاں ہے، توانائی ملکی ترقی اور خوشحالی کیلئے ریڑھ کی ہڈی کی حیثیت رکھتی ہے،پارلیمنٹ مشترکہ مسائل پر غور و فکر اور قابل عمل حل تلاش کرنے کا بہترین پلیٹ فارم ہے،صنعتی، اقتصادی اور سماجی ترقی کا دارومدار توانائی پر منحصر ہوتا ہے۔اسپیکر قومی اسمبلی نے کہا کہ توانائی کی طویل مدتی پائیداری کو یقینی بنانے کے لیے مستقبل کی پالیسی سازی ضروری ہے،پالیسی سازی اور اس پر عمل درآمد کو یقینی بنانے کیلئے پارلیمان کا کردار انتہائی اہمیت کا حامل ہے

وزیر دفاع خواجہ آصف نے کہا کہ فیض حمید کے وعدہ معاف گواہ بننے کی پیشگوئی نہیں کرسکتا۔ایک انٹرویو میں خواجہ آصف نے کہا کہ خود بانی پی ٹی آئی کو پتا ہے کہ جنرل ریٹائرڈ فیض حمید کی ساری کہانی کا کُھرا بانی پی ٹی آئی کی طرف جائے گا۔ بانی پی ٹی آئی جو کچھ کرتے رہے ہیں، فیض حمد اس سب سے باخبر آدمی ہیں۔ معاملات زیادہ عرصہ معلق نہیں رہیں گے، سب چند دنوں میں طے ہو جائے گا۔انکا کہنا تھا کہ اختر مینگل کو انگیج کرنا ضروری ہے۔ استعفیٰ واپس لینے کیلئے انکے خدشات دور کرنا چاہئیں۔ اختر مینگل سے بات چیت ہوسکتی ہے اور کرنی چاہیے۔ وزیر دفاع نے کہا کہ اختر مینگل کے ذریعے کہلوایا جائے کہ ہم بلوچستان کے مسائل حل کریں گے۔ بلوچستان کی بہتری کیلئے کئی مواقع ضائع کیے گئے۔ بلوچستان کی محرومیوں کی وجہ سے وہاں ملک دشمن عناصر کو تقویت ملی۔خواجہ آصف نے کہا کہ ان تمام وجوہات کو ختم کرناچاہیے جن کی وجہ سے بلوچستان میں مسائل ہو رہے ہیں۔ نواز شریف، شہباز شریف اور دیگر لیڈر ماضی میں قومی ڈائیلاگ کا کہہ چکے ہیں۔انھوں نے کہا پی ٹی آئی میں 4 گروپ بن چکے ہیں۔ پی ٹی آئی والے سیاسی جماعتوں سے بات کرنا نہیں چاہتے۔ وہ بار بار اسٹیبلشمنٹ کو آوازیں لگاتے ہیں، انکے نزدیک سیاسی جماعتوں کی وقعت نہیں۔ انھوں نے کہا میں نہیں سمجھتا کہ اسٹیبلشمنٹ ان مذاکرات میں شامل ہونا چاہتی ہو۔ نواز شریف نے میٹنگ میں ایسی کوئی بات نہیں کی جیسا تاثر دیا جا رہا ہے۔ خواجہ آصف کا کہنا تھا کہ محمود اچکزئی سیاسی جماعتوں سے بات کرتے ہیں تو ہم خیر مقدم کریں گے۔ اگر محمود اچکزئی کے ساتھ کچھ باتوں پر اتفاق ہوتا ہے تو کیا بانی پی ٹی آئی اسے مانیں گے۔ محمود اچکزئی نے کہا وہ اسٹیبلشمنٹ سے بات کرنے کے حق میں نہیں۔ خواجہ آصف نے کہا کہ پی ٹی آئی کی حکومتوں میں کھربوں روہے کے پی میں دفن ہوئے۔انھوں نے کہا کہ بانی پی ٹی آئی نے سازش اور وارداتیں کی ہیں، 2018 میں آر ٹی ایس بٹھا کر انھیں جتایا گیا، جو باجوہ اور فیض کا جوائنٹ وینچر تھا۔

پاکستان ہائی کمیشن، نئی دہلی

2 ستمبر 2024

پاکستانی زائرین کی سرہند شریف میں حضرت مجدد الف ثانیؒ کے سالانہ عرس مبارک میں شرکت

پاکستان ہائی کمیشن نئی دہلی کے ناظم الامور سعد احمد وڑائچ نے حضرت مجدد الف ثانیؒ کے مزار پر حکومت پاکستان اور عوام کی جانب سے روایتی چادر چڑھائی

حضرت مجدد الف ثانیؒ کے 411 ویں سالانہ عرس مبارک میں شرکت کے لئے بھارت آنے والے 75 پاکستانی زائرین کا گروپ بھی اس موقع پر موجود تھا

درگاہ آمد پر سجادہ نشین خلیفہ سید محمد صادق رضا اور دیگر نے ناظم الامور اور پاکستانی زائرین کا استقبال کیا

شرکاءنے درگاہ پر پاکستان کی ترقی اور خوشحالی کے لئے دعائیں مانگیں

ناظم الامور نے عظیم اسلامی سکالر مجدد الف ثانیؒ کو خراج عقیدت پیش کیا

حضرت مجدد الف ثانیؒ نے بر صغیر میں اسلام کے احیاءمیں اپنا کلیدی کردار ادا کیا ، ناظم الامور

حضرت مجدد الف ثانیؒ کی تعلیمات اور نظریات نے معاشرے پر گہرے اثرات مرتب کئے، انکی تعلیمات ہمارے لیے روحانی رہنمائی کا باعث ہیں، ناظم الامور

ناظم الامور نے سالانہ عرس کے موقع پر پاکستانی زائرین کے لئے بہترین انتظامات پر سجادہ نشین اور مقامی انتظامیہ کا بھی شکریہ ادا کیا

اس موقع پر زائرین اور ان کے نمائندوں نے بھی دورے میں سہولت فراہم کرنے پر حکومت پاکستان اور پاکستان ہائی کمیشن کا شکریہ ادا کیا

پاکستانی زائرین مذہبی مقامات کے دوروں کے حوالے سے 1974ءکے انڈیا۔ پاکستان پروٹوکول کے تحت دورہ کر رہے ہیں۔