ڈبو کے شہر کو یک دم اتر گیا پانی ———————————————شاہد اقبال کامران —————————ہماری ریاست ماں جیسی نہیں ، ورنہ کوئی ماں اپنے بچوں کو پانی میں غرق نہیں ہونے دیتی ۔ ہماری ریاست باپ جیسی بھی نہیں کہ۔جو اپنے بچوں کا کفیل ہو ۔ہماری ریاست ،جیسا کہ بتایا جاتا ہے کوئی نظریاتی ریاست ہے ۔اس سے مراد یہ ہے کہ کسی نظریے کی چادر میں چھپ کر ریاست اپنی پرستش کروانا چاہتی ہے اور جبرا ایسا کروا بھی رہی ہے ۔ لوگوں کو یہ بات ذہن میں رکھنی چاہیئے کہ اسلام میں بت پرستی مکمل طور پر حرام ہے۔کسی بھی قسم کے بت کو توڑنا ، پاش پاش کرنا ہر مسلمان کا فرض ہے ۔دوسری بات یہ کہ چونکہ حکومت کا نظام یہاں ناکام و نامراد ہو چکا ہے اس لیے معاشرتی نظم و نسق کے دیگر متبادلات پر غور وفکر کرنا ضروری ہو گیا ہے۔

حالیہ سیلاب کے دوران بلوچستان اور جنوبی پنجاب میں جو تباہی مچی ،اور جس طرح سے ہمارے تنخواہ دار حکمرانوں نے روپوشی اختیار کی ہے ۔اسے عامتہ الناس کو یاد رکھنا چاہئیے۔سیلاب زدہ علاقوں میں بیماریاں پھیلنے کا بھی خدشہ ہے۔لوگوں کو چاہئیے کہ انتظار کرنے کی بجائے انتظامیہ کے قلعہ نما محلات پر قبضہ کرلیں۔اور اپنی تقدیر کے مالک خود بنیں۔جب سے ملک کے بیشتر علاقوں میں تند و تیز بارشوں اور بھارت کی طرف سے خاموش دریاؤں میں چھوڑے پانی کی وجہ سے سیلاب بلاخیز نے تباہی مچا رکھی ہے ،ملت پاکستانیہ کو شرم اور حیا کی طرف متوجہ کرنے والے سیالکوٹ کے خواجہ آصف بالکل غائب ہیں ۔شرلی بے بنیاد کی تحقیق کے مطابق جس وزیر کو وفاقی کابینہ میں بالکل فارغ رکھنا ہو

،اسے وزیر دفاع بنا دیا جاتا ہے ۔شرلی کا اصرار ہے کہ اس وزرات کی املا غلط لکھی جاتی ہے ،اس کے نزدیک اصل املا “وزیر دفع” ہے ،جو غلطی سے دفاع قیاس کر لی گئی ہے۔ وجہ صرف یہ ہے کہ دفاع سے متعلق معاملات دفاع والے خود ہی دیکھ لیتے ہیں ، وہ اپنا سیکرٹری دفاع مقرر کر کے اسے کھیلنے کے لیے ایک وفاقی وزیر دے دیتے ہیں تاکہ دستخط کرنے کے کام آسکے۔خواجہ آصف جونسا جونسا کی تکرار کے ساتھ اپنے سیاسی مخالفین پر طنز کے بے تدبیر تیر چلانے میں بڑے ماہر ہیں

۔وہ دوسرے سیاستدانوں سے ہر اس خوبی کی توقع رکھتے ہیں ، جو خود ان کے اپنے اندر نہیں ہوتی۔قوم کو شرم و حیا کی طرف متوجہ کرنے والے خواجہ آصف اس وقت خود اپنے وزیراعظم شہباز شریف اور اپنی حکومت کو خواب غفلت سے بیدار کرنے اور شرم و حیا کی ضرورت و اہمیت سے آگاہ کرنے میں غفلت کا مظاہرہ کیوں کر رہے ہیں؟ وہ ملک کے سیاسی منظر سے بالکل غائب ہیں ۔بلوچستان اور جنوبی پنجاب کے زیریں علاقے پانی کی غارت گری کا شکار ہیں ۔صوبائی حکومت کی غفلت شعاری ایک طرف ،لیکن ہماری ازخود انقلابی وفاقی حکومت اپنا فرض کیوں ادا نہیں کر رہی؟شہبازشریف نے شروع شروع میں اپنی انگلی لہرا لہرا کر انقلابی باتیں کرنا شروع کی تھیں

۔پھر بھیک مانگنے کا سلسلہ شروع ہوا اور ایسے ایسے نادر طریقے اور دردناک سلیقے سے بھیک مانگی گئی کہ اب پاکستانی بھکاریوں کا یہ منشور بن گیا ہے کہ “آپ سمجھے ہیں کہ میں بھیک مانگنے آیا ہوں۔ بس ایک بار آپ ہماری مدد کر دیں۔۔۔۔ ۔۔۔” یہ تو سچ ہے کہ مصیبت بتا کر نہیں آتی ،لیکن موسمی پیشگوئی اب سائنس بن چکی ہے ۔سیلاب تو بتا کر ہی آیا ہے ، بارش کا بھی پیشگی اندازہ کر لیا جاتا ہے ۔اس کے بعد اس کے اثرات کو قابو کرنے کی منصوبہ بندی اور اقدامات کی ذمہ داری حکومت پر آتی ہے ۔تحصیل دار سے لے کر کمشنر تک ،اورکمشنر سے لے کر چیف سیکرٹری اور پھر وزراء اور وزیر اعلی تک سب کی ذمہ داری شروع ہوتی ہے۔لیکن پنجاب کے اداکار وزیر اعلی پرویز الٰہی اپنی سیاسی مصروفیات میں اس قدر الجھے بیٹھے ہیں کہ انہیں ابھی تک سیلاب زدگان کی طرف توجہ دینے کی فرصت نہیں ملی۔

شائد ان کا خیال ہے کہ ان کی وزارت اعلی تو پی ٹی آئی کے ووٹوں پر کھڑی ہے ، جنوبی پنجاب کے غریب سرائیکیوں کے ووٹ پر تو نہیں،لہذا انہوں نے تونسہ یا فاضل پور یا کوہ سلیمان کے اطراف کا دورہ کرنے کی بجائے بنی گالہ جا کر عمران خان کے دربار میں حاضری دینا مناسب سمجھا۔سنا ہے کہ انہوں نے اپنے شہر گجرات کے لیے اربوں کے ترقیاتی فنڈز کا اعلان کیا ہے۔شکر ہے گجرات جنوبی پنجاب میں واقع نہیں ،ورنہ اس فنڈ سے سرائیکی بولنے والے غریب لوگوں کا بھی کچھ بھلا ہو سکتا تھا۔

ستم ظریف کا موقف ہے کہ پاکستان کے مرکزی سیاست دان ،چاہے وہ صوبائی حکومت میں ہوں ،چاہے وفاقی حکومت میں ،وہ جانتے ہیں کہ جنوبی پنجاب کے ایم پی ایز اور ایم این ایز کو تو نقد ادائیگی کر کے بازار سے ہی خریدنا ہے ۔تو پھر ان کے ووٹروں کی دلداری کرنے کیا ضرورت ہے۔ وہاں کا سردار ،وڈیرا ،خان ، پیر اور سجادہ نشین اصل بیماریاں ہیں ،جو سیلاب گزر جانے کے بعد بھی موجود اور ناقابل علاج رہیں گی ۔میں نے ستم ظریف کو سمجھایا ہے کہ جنوبی پنجاب کو ریاست پاکستان کا ایک حصہ سمجھ کر سوچنے کی مشق کرنی ہو گی۔بالکل اس طرح جیسے بلوچستان کو پاکستان کا ایک با عزت حصہ ماننا پڑے گا

۔میں نے اسے بتایا کہ سیلاب کی بے رحم تباہ کاری کا مسلہ سیاسی نہیں انسانی المیہ ہے ۔لیکن افسوس اور عبرت کا مقام یہ ہے کہ ہماری حکومتیں اس باب میں مکمل خاموشی اختیار کیے بیٹھیں ہیں۔اب جبکہ ان گنت اموات اور نقصان ہو چکا ہے تو خبر آئی ہے کہ وزیراعظم اورآرمی چیف نے از راہ کرم ٹیلیفون کے ذریعے رابطہ کر کے سیلاب متاثرین کی بحالی کے لیے اقدامات کرنے پر اتفاق کر لیا ہے۔آپ سوچیے جن لوگوں نے اس تباہی سے پہلے منصوبہ بندی کرنی تھی ، وہ بعداز خرابی بسیار اب ایک دوسرے کو ٹیلی فون کے ذریعے بتا رہے ہیں کہ سیلاب متاثرین کی بحالی کی طرف توجہ دینے کی ضرورت ہے

۔بس یہی المیہ ہے کہ ابھی تک وزیراعظم “ضرورت ہے” ہی کی تکرار کیے جارہے ہیں۔وہ یہ نہیں بتاتے کہ یہ ضرورت کون پوری کرے گا۔سنا ہے کہ وزیراعظم نے سپہ سالار جنرل قمر جاویدباجوہ کے علاؤہ چیئرمین این ڈی ایم اے لیفٹیننٹ جنرل اخترنواز سے بھی ٹیلی فون پر گفتگو کی ہے

۔یہ جو نیشنل ڈیزاسٹر منیجمنٹ اتھارٹی کے جنرل اختر نواز نامی چیئرمین صاحب ہیں ،نہیں تو فوراً واپس اپنی اصل ڈیوٹی پر اس رپورٹ کے ساتھ بھیج دینا چاہئیے کہ یہ موصوف اپنی ذمہ داری ادا کرنے میں غفلت کے مرتکب ہوئے ہیں

۔لیکن ہمارے وزیراعظم نے کئی دن تک اپنے سینے میں سانس کی مشق کرنے کے بعد ان موصوف سے بات کرنے کی ہمت کی۔ چیئرمین این ڈی ایم اے نے وزیراعظم کو سندھ میں بارشوں اور سیلاب کی تازہ ترین صورتحال سے آگاہ کیا۔یہ بھی اللہ کا شکر ہے ورنہ وزیراعظم کو سندھ میں سیلاب کی صورتحال کا کس طرح سے پتہ چلتا۔اس پوری گفتگو میں جنوبی پنجاب کے مظلوم اور غرقاب علاقوں کا اشارتاً بھی ذکر نہیں آیا۔ہاں مگر شہباز شریف نے پھر وہی کیا ،جو انہیں کرنا آتا ہے ۔یعنی ریاست کے پیسوں سے اخباروں میں اشتہارات چھپوا کر کارروائی ڈالنا۔ وزیر اعظم شہباز شریف صاحب ! یہ تصویری اور اشتہاری ڈرامے بند کریں۔بلوچستان ، جنوبی پنجاب اور سندھ کے بہت سے علاقے بدترین سیلاب کی زد میں ہیں۔

اور آپ کروڑوں روپے کے اشتہارات کی رشوت اخبارات کو دے رہے ہیں۔ذرا کوہ سلیمان کے اطراف پھنسے ہوئے مجبور لوگوں کی خبر لیں۔آپ پرانے ڈراموں کی تصویریں لگا کر داد سمیٹنا چاہتے ہیں۔بلائیں ذرا خواجہ آصف کو جو قوم کو بتایا کرتا تھا کہ؛ کوئی شرم ہوتی ہے ،کوئی حیا ہوتی ہے۔میں اس سے پوچھوں گا کہ اتنی اہم بات شہباز شریف کو کیوں نہیں بتائی؟ شاعر باکمال فیصل عجمی کے شعر یاد آرہے ہیں،وہ کہتے ہیں کہ؛زمیں کی نوحہ گری سن کے ڈر گیا پانیڈبو کے شہر کو یک دم اتر گیا پانیمیں ایک بار پکارا کوئی بچاؤمجھےپھر اس کے بعد میرے منہ میں بھر گیا پانیجو ڈوب گئے ، وہ تلاش مرگ میں تھےچلو کسی پہ تو احسان کر گیا پانی —————————————–

*_روس کے صدر اور پاکستان کے وزیراعظم کے درمیان ملاقات_* وزیر اعظم پاکستان محمد شہباز شریف نے رشین فیڈریشن کے صدر عزت مآب ولادیمیر پیوتن سے آج بیجنگ، چین میں ملاقات کی۔2024 میں آستانہ میں ہونے والی اپنی ملاقات کو یاد کرتے ہوئے، دونوں رہنماؤں نے گزشتہ ایک سال کے دوران تعاون کو وسعت دینے اور اس کی پیشرفت پر اطمینان کا اظہار کیا۔ دونوں رہنماؤں نے اتفاق کیا کہ دونوں ممالک کے درمیان تعلقات باہمی اعتماد، احترام اور گرمجوشی پر مبنی ہیں۔ اس بات کی بنیاد پر کہ پاکستان روس کے ساتھ اپنے تعلقات کو بہت اہمیت دیتا ہے، وزیراعظم نے روس کے ساتھ تجارتی روابط، توانائی، زراعت، سرمایہ کاری، دفاع، مصنوعی ذہانت، تعلیم، ثقافت اور عوام سے عوام کے تبادلے جیسے شعبوں میں دوطرفہ تعلقات کو بڑھانے کے لیے پاکستان کی تیاری اور دلچسپی سے آگاہ کیا۔ انہوں نے یہ بھی بتایا کہ یہ بات خوش آئند ہے کہ مختلف عالمی پلیٹ فارمز پر دونوں ممالک کے نقطہء نظر میں کافی حد تک مماثلت ہے۔ مزید برآں، وزیراعظم نے دونوں ممالک کے درمیان قائم ادارہ جاتی میکانزم کو مزید مضبوط بنانے پر زور دیا۔ انہوں نے یہ بھی کہا کہ مجوزہ پاکستان اسٹیل مل (PSM) کراچی کے فلیگ شپ پراجیکٹ اور کنیکٹیوٹی پراجیکٹس میں سرمایہ کاری جیسے ٹھوس اقدامات آنے والی نسلوں کے لیے پاکستان روس دوستی کی علامت ہوں گے۔دوطرفہ تعلقات کے بارے میں پاکستان کے وزیر اعظم کے جائزے سے اتفاق کرتے ہوئے، صدر ولادیمیر پیوتن نے دونوں ممالک کے درمیان تعلقات کی بلندی کی رفتار کا ذکر کیا۔ انہوں نے اس بات پر بھی زور دیا کہ شنگھائی تعاون تنظیم جیسی تنظیموں میں تعاون کا فروغ علاقائی اور عالمی سلامتی اور استحکام میں اہم کردار ادا کر سکتا ہے۔ مزید برآں، انہوں نے روس کے پاکستان کے ساتھ مختلف موضوعات پر دوطرفہ تعاون کو مزید مضبوط بنانے کے عزم کا اظہار کیا۔ دونوں رہنماؤں نے جنوبی ایشیاء کی صورتحال، افغانستان، مشرق وسطیٰ اور یوکرین کے تنازع پر بھی تبادلہ خیال کیا۔ انہوں نے کثیرالجہتی فورمز پر جاری تعاون کے ساتھ ساتھ فلسطین اور کشمیر جیسے دیرینہ مسائل اور عالمی دلچسپی کے تنازعات پر بھی تبادلہء خیال کیا۔ملاقات کے دوران روسی صدر نے وزیراعظم محمد شہباز شریف کو روس کا سرکاری دورہ کرنے کی دعوت دی۔___

*غربت کے خاتمے اور مشترکہ خوشحالی کا چینی صدر شی جن پھنگ کا ویژن ہمارے لیے مشعل راہ ہے، وزیر اعظم شہباز شریف*وزیر اعظم محمد شہباز شریف نے کہا ہے کہ پاک چین دوستی باہمی اعتماد، احترام اور پرخلوص محبت کی بنیاد پر قائم ہے۔ انہوں نے کہا کہ غربت کے خاتمے اور مشترکہ خوشحالی کا چینی صدر شی جن پھنگ کا ویژن ہمارے لیے مشعل راہ ہے۔ انہوں نے ان خیالات کا اظہار چین کی تھیئن جن یونیورسٹی میں فیکلٹی ممبران اور طلباء سے خطاب کرتے ہوئے کیا۔ اس موقع پر نائب وزیر اعظم و وزیر خارجہ اسحاق ڈار، وفاقی وزیر منصوبہ بندی و ترقی احسن اقبال، وفاقی وزیر اطلاعات و نشریات عطا اللہ تارڑ، وزیر اعظم کے معاون خصوصی طارق فاطمی اور ان کے وفد کے دیگر ارکان بھی موجود تھے۔ وزیر اعظم نے کہا کہ تھیئن جن یونیورسٹی میں موجودگی میرے لیے فخر کا باعث ہے، پہلی بار 2017ء میں ، میں نے اس یونیورسٹی کا دورہ کیا تھا اور پاکستانی اور چینی طلباء سے ملاقات کی تھی۔ انہوں نے کہا کہ تھیئن جن یونیورسٹی علم و دانش کی بہترین درسگاہ ہے۔

انہوں نے کہا کہ پاکستان اور چین نے ہر مشکل وقت میں ایک دوسرے کا ساتھ دیا ہے۔ انہوں نے کہا کہ بہت سی تبدیلیاں بھی آتی رہی ہیں لیکن ہماری دوستی مضبوط سے مضبوط تر ہوئی ہے۔ وزیر اعظم نے کہا کہ پاکستان اور چین تاریخی اور ثقافتی اعتبار سے ایک دوسرے سے جڑے ہوئے ہیں۔ انہوں نے کہا کہ چین نے 80 کروڑ سے زائد افراد کو خط غربت سے نکالا ہے۔ انہوں نے کہا کہ یہ ایک بہت بڑی کامیابی اور دنیا کے لیے ماڈل ہے۔ انہوں نے کہا کہ شفافیت اور ان تھک محنت قوموں کی تقدیر بدل سکتی ہے۔ انہوں نے کہا کہ پاکستان کی 60 فیصد آبادی نوجوانوں پر مشتمل ہے، ہمیں چین کے ماڈل سے سیکھنے کی ضرورت ہے۔ انہوں نے کہا کہ 30 ہزار کے قریب پاکستانی چین میں زیر تعلیم ہیں، ہمیں نوجوانوں کی صلاحیتوں سے استفادہ کرنا ہے۔

سب کچھ بدلا لیکن ہماری گوورننس کا طریقہ نہ بدلا- گوورننس آج بھی ایک ہاتھ دو، ایک ہاتھ لو کے کلیے پر عمل پیرا ھے-سیاست، ریاست کی ترقی اور استحکام کا پہلا زینہ ہے- جب کھانا بنانے والی ھانڈی کا پیندہ ہی نہیں تو کھانا کیسے بنے گا- ہمارے ہاں پچھلے اٹھتہر برسوں میں صرف سیاسی عدم استحکام کو استحکام حاصل ھے – جب پیندہ ہی ٹوٹ گیا تو سیاسی ہانڈی کیسے پکی گی-جس طرح زمیں سورج کے گرد چکر لگا رہی ہے اور لگاتی جا رہی ھے، اسی طرح ہم افراتفری اور ابتر حالات کے گرد ، سردائی پی کر، اندھا دھند دھمال ڈالتے جا رہے ہیں- گوورننس اور عوامی مزاج mutually exclusive ہیں-باہر سے کچھ نہیں آیا- ہم ایک مکمل extractive سسٹم میں بند ہیں- اسی لئے ملک میں صرف افراتفری کو استحکام حاصل ہے-سیرالیون افریقہ کے جنوب میں ،ھیرے کی کانوں کی وجہ سے مشہور ، ملک ھے جو اپنی ملکی قیادت کی نااھلی کی وجہ سے غریب ترین ملکوں میں شمار ہوتا ھے-

دو دھائیاں قبل اقوام متحدہ کی فوج کا حصّہ بن کر وہاں جانے کا اتفاق ہوا- کوئیڈو شہر کے دو اطراف ھزاروں لوگ دن بھر ھیرے کھودتے نظر آتے اور غیر ملکی ان سے کوڑیوں کے بھاؤ ھیرے خرید لیتے- اتنی غربت تھی کہ لوگ دو وقت کا کھانا کھانے سے معزور تھے- وجہ صرف نا اھل قیادت-ہمارے ہاں مس گوورننس کی بنیادی وجہ ہماری ادھوری معلومات، محظ سیاسی بیان بازی، تجزیے اور زرخیز سوچ کی کمی ھے- لگے بندے چار پانچ سیاسی ٹوٹکے ہیں جن کا ہم باقاعدگی سے استعمال کرتے آ رھے ہیں-مغلیہ سلطنت کی تباھی اور پر رونق گورننس کی سب سے بڑی وجہ یہی تھی کہ ان کو چَس اور کام کرنے کے فرق کا بہت جلد علم ہو گیا – اکبر کے زمانے سے فتوحات کا جو سلسلہ شروع ہوا وہ اورنگزیب پر آ کر ختم ہو گیا-

مغلیہ شہزادے جنگوں کی سختیوں کے عادی نہ رہے -وہ بھانپ چکے تھے کہ جنگیں لڑنا ان کے بس کی بات نہیں- عافیت اسی میں ھے کہ دن کو سو جاؤ اور فریش ھو کر رات کی تاریکی میں محفل سجاؤ- کو جاگو جائے- اس زمانے میں کیونکہ انٹر نیٹ کی سہولت نہیں تھی، اس لئے طبلے اور گھنگرو سے کام چلاتے تھے- محمد شاہ رنگیلا نے گوورنس کو کچّے ٹریک پر ڈال کرگوورننس کے کس بل درست کئے اور بالاخر معاملات نادر شاہ سے ھوتے ایسٹ انڈیا کمپنی کے سپرد کر کے سر خرو ھوا- سیاست، گوورننس، تجارت ہر جگہ یہی منصوبہ بندی کی جاتی ہے کہ عام آدمی کی آنکھوں میں دھول کیسے جھونکنی ہے- عام آدمی کو دھوکہ دینے کےایسے ایسے طریقے استعمال کئے جا رھے ھیں کہ عقل دنگ رھ جاتی ھے۔ کسی نے بیگانگی کی حد دیکھنی تو ہمیں دیکھ لے-

دنیا کے تمام مسائل ، پریشانیوں اور خطروں سے بے نیاز ہم علیحدہ قسم کے پیچے ڈال کے بیٹھے ہوئے ہیں- کبھی اُدھر سے بُو کاٹا کی آواز آتی ہے کبھی اِدھر سے-بسنت کا سماں ہے-پچیس سال سے پاکستان دہشت گردی کے خلاف جنگ لڑ رہا ہے، 2005 کا زلزلہ، 2010 اور 2022 کے سیلاب، تھر کی خشک سالی، آبی وسائل کی کمی،

گیس کے تقریبا ختم ہوتے ہوئے وسائل، آئی پی پیز کے معاملات ،معدنیات سے فائدہ اٹھانے کی صلاحیت کا فقدان، انفارمیشن کی بدلتی صورتحال نے گوورننس کو اتنا پیچیدہ بنا دیا ھے کہ ہمارے معجزاتی تبدیلیاں درکار ہیں-