پاک بحریہ کے جہاز پی این ایس ذوالفقار نے خلیج عدن میں 23 ایرانی ماہی گیروں کو بچا لیا۔ پاک فوج کے شعبہ تعلقات عامہ آئی ایس پی آر کے مطابق پی این ایس ذوالفقار ریجنل میری ٹائم سیکیورٹی پٹرولنگ پر تھی کہ ایرانی ماہی گیر کشتی کی جانب سے ہنگامی مدد کی کال موصول ہوئی۔ آئی ایس پی آر کے مطابق ایرانی کشتی اپنی بندرگاہ سے 1200 ناٹیکل میل پر تھی، ایرانی کشتی نے ایک رکن کے شدید زخمی ہونے اور انجن کے خراب ہونے کی اطلاع دی تھی۔آئی ایس پی آر نے بتایا کہ پی این ایس ذوالفقار کے عملے نے ایرانی ماہی گیروں کو طبی امداد دی اور عملے نے تکنیکی مدد فراہم کرتے ہوئے انجن کی مرمت بھی کی۔آئی ایس پی آر نے بتایا کہ تعیناتی کے دوران پاک بحریہ کے جہاز سمندر میں متاثرہ بحری جہازوں کو ریسکیو کرتے ہیں۔ امدادی آپریشن بحری جہازوں کی حفاظت اور سلامتی کےلیے پاک بحریہ کے عزم کو ظاہر کرتا ہے۔

پاکستان تحریک انصاف (پی ٹی آئی) کے سیکریٹری جنرل سلمان اکرم راجہ نے شیر افضل مروت کو وارننگ دیتے ہوئے کہا کہ شیر افضل مروت کو موقع دے رہے ہیں ڈسپلن کا مظاہرہ نہیں کیا تو کارروائی کریں گے۔لاہور میں میڈیا سے گفتگو کرتے ہوئے سلمان اکرم راجہ نے کہا کہ 26ویں آئینی ترمیم پاکستان کے آئین اور عدلیہ پر حملہ ہے، تحریک انصاف اس کے خلاف بھر پور مزاحمت کرے گی۔انہوں نے مزید کہا کہ دھرنے اور احتجاج سے متعلق ہمارا پلان ہے، ہم بہت جلد ملک گیر احتجاج کا اعلان کریں گے۔پی ٹی آئی رہنما نے کہا کہ بانی چیئرمین پی ٹی آئی کے ساتھ غیر انسانی سلوک کیا جا رہا ہے، بشریٰ بی بی کا سیاست میں کردار ادا کرنے کا کوئی ارادہ نہیں۔

جولائی تا ستمبر اخراجات کے مقابلے میں حکومتی آمدن میں نمایاں اضافہ ریکارڈ کیا گیا، موجودہ مالی سال کی پہلی سہ ماہی کے فسکل آپریشنز کی رپورٹ جاری کر دی گئی۔اسلام آباد سے جاری رپورٹ کے مطابق دو دہائیوں بعد 1696 ارب سے زائد کا مجموعی بجٹ سرپلس ریکارڈ کیا گیا۔ دستاویز کے مطابق صوبوں نے 160 ارب کم اخراجات کیے، وفاق کا بجٹ سرپلس 1536 ارب رہا۔ اس دوران 3002 ارب روپے سے زیادہ مجموعی پرائمری سرپلس ریکارڈ کیا گیا۔ وزارت خزانہ کے مطابق تین ماہ میں وفاق کی آمدن 4019 ارب جبکہ اخرجات 2483 ارب روپے رہے، جولائی تا ستمبر ٹیکس ریونیو 521 ارب اور نان ٹیکس ریونیو میں 2568 ارب اضافہ ہوا۔ وزارت خزانہ کے مطابق گزشتہ مالی سال اسی مدت میں 1031 ارب کا مالی خسارہ ہوا تھا۔رواں مالی سالی کی پہلی سہ ماہی میں سود کی ادائیگی پر 2341 ارب روپے ادا کیے گئے۔ رپورٹ کے مطابق پہلی سہ ماہی میں دفاع پر 220 ارب روپے اکٹھے کیے گئے۔رپورٹ کے مطابق رواں مالی سال پہلے 3 ماہ کے دوران پینشن کی ادائیگی پر 410 ارب روپے خرچ ہوئے۔ وفاقی حکومت نے جولائی سے ستمبر تک 20 ارب روپے کی سبسڈی ادا کی۔وزارت خزانہ کے مطابق ترقیاتی پروگرام پر 278 ارب روپے خرچ کیے گئے، این ایف سی کے تحت صوبوں کو 1565ارب روپے منتقل ہوئے۔ صوبوں کو مجموعی طور پر 1920 ارب روپے منتقل کیے گئے۔رپورٹ کے مطابق بیرونی فنڈنگ کا حجم 313 روپے رہا جس مں 62.7 ارب پروگرام لون تھا، نان ٹیکس ریونیو میں 2568 ارب روپے اضافے سے حجم 3021 ارب روپے تک پہنچ گیا۔

متحدہ عرب امارات (یو اے ای) میں جاری ویزا ایمنسٹی اسکیم میں دو ماہ کا اضافہ کیا گیا ہے۔ جمعرات کو اماراتی فیڈرل اتھارٹی برائے شناخت، شہریت، کسٹمز اور پورٹس سیکیورٹی نے ویزا ایمنسٹی اسکیم میں اضافے کا اعلان کیا۔دبئی سے اماراتی حکام کے مطابق ویزا ایمنسٹی اسکیم میں 31 دسمبر 2024 تک توسیع کر دی گئی ہے۔ یاد رہے کہ اس اسکیم کا آغاز یکم ستمبر سے ہوا اور اسے 31 اکتوبر کو ختم ہونا تھا۔ ہزاروں افراد نے اس اسکیم سے فائدہ اٹھاتے ہوئے اپنے ویزا اسٹیٹس کو ریگولرائز کرایا۔ اماراتی حکام نے اس کے نتیجے میں اوور اسٹے کرنے والوں کو لاکھوں کے جرمانے سے چھوٹ دی۔اماراتی حکام کے مطابق ایکسپائرڈ ویزے والے افراد کو بغیر جرمانہ قانونی رہائشی بننے کا موقع دیا جا رہا ہے۔

امریکی کانگریس کے 62 اراکین کی جانب سے صدر جو بائیڈن کو عمران خان کی رہائی کے لیے لکھے گئے خط کے جواب میں پاکستانی پارلیمنٹ کے 160 اراکین نے وزیراعظم شہباز شریف کو خط لکھ دیا، ارکان پارلیمنٹ نے کانگریس اراکین کے خط پر شدید تشویش کا اظہار کیا ہے۔پاکستانی ارکان پارلیمنٹ نے خط امریکی کانگریس کے 62 ارکان کی پاکستان کی داخلی صورتحال میں مداخلت پر لکھا، خط کے مطابق بانی پی ٹی آئی بدعنوانی کے ثابت شدہ الزامات کے تحت قید کاٹ رہا ہے، کانگریس ارکان کی جانب سے زیرسماعت مقدمات پرتبصرہ عدالتی عمل کو متاثر کرنے کے مترادف ہے۔ممبرانِ پارلیمنٹ نے کہا کہ آکسفورڈ یونیورسٹی نے بانی پی ٹی آئی کے مجرمانہ ریکارڈ کی وجہ سے چانسلرکے انتخاب سے باہر کیا، بانی پی ٹی آئی نے پاک امریکہ تعلقات کی موجودہ تاریخ کا سب سے سنگین بحران پیدا کیا۔موجودہ دور امریکامیں ایک بےمثال سیاسی سرگرمی کاہےجس کی وجہ سےانتخابات میں بہت زیادہ مقابلہ ہوا، سیاسی جماعتیں تمام حلقوں سے حمایت کےلیے لابنگ کرتی ہیں۔ خط کے مطابق پاکستان میں سیاست کے بارے میں ایسے تبصروں کو مداخلت اور بے بنیادسمجھا جاتاہے، ووٹرز کےایک مخصوص طبقے کو مطمئن کرنے کےلیے دیگرممالک کو انتخابی میدان میں گھسیٹنا ناجائز ہے، سفارتی رابطے کا اسی طرح سیاسی فائدے کے لیے غلط استعمال کیا گیا۔خط میں مزید کہا گیا ہے کہ بانی پی ٹی آئی نے ریاستی اداروں کے خلاف سیاسی تشدد ، مجرمانہ دھمکیاں متعارف کرائیں، نو مئی 2023 کو بڑے پیمانے پر ہنگامہ آرائی اور توڑ پھوڑ کی ، ہجوم کو پارلیمنٹ، سرکاری ٹی وی کی عمارت پر حملے لیے لئے اکسایا گیا، بانی پی ٹی آئی نے انتشاری سیاست سے اگست 2014 اور مئی 2022 میں ملک کو مفلوج کیا۔خط کے مطابق بحیثیت پارلیمنٹیرین سمجھتے ہیں کہ وزیراعظم کے ذریعےکانگریس ارکان کو آگاہ کریں، پاکستان جمہوری چیلنجز سے نبرد آزما ہے جسے انتہاپسندی کی سیاست نے مزید پیچیدہ کر دیا ہے۔ وزیراعظم کو لکھے گئے خط میں کہا گیا ہے کہ بانی پی ٹی آئی نے ڈیجیٹل دہشتگردی سے سوشل میڈیا کو انتشار اور بدامنی کو ہوا دینے میں استعمال کیا، عمران خان نے ڈیجیٹل دہشتگردی سے ریاست کو دھمکانے کیلئے سوشل میڈیا کو استعمال کیا۔

صدر مملکت آصف علی زرداری کے پاؤں میں فریکچر ہوگیا۔ایوان صدر کا کہنا ہے کہ صدر مملکت کے پاؤں میں گزشتہ رات دبئی ایئرپورٹ پہنچنے پر جہاز سے اترتے ہوئے فریکچر ہوا۔ایوان صدر کے مطابق صدر آصف علی زرداری کو ابتدائی طبی امداد کیلئے اسپتال منتقل کیا گیا، جہاں ڈاکٹرز نے صدر کے پاؤں پر 4 ہفتے کیلئے پلاسٹر چڑھایا۔ ایوان صدر کا کہنا ہے کہ صدر آصف علی زرداری اسپتال سے گھر منتقل کردیے گئے، ڈاکٹروں نے مکمل آرام کا مشورہ دیا ہے—–۔محکمہ پاسپورٹ نے پاسپورٹ رولز میں ترمیم کرتے ہوئے شناختی کارڈ ایڈریس کی شرط ختم کردی، جس کے بعد اب شہری پاکستان کے کسی بھی شہر سے پاسپورٹ بنوا سکیں گے۔محکمے کی جانب سے پاسپورٹ رولز میں ترمیم کا مراسلہ علاقائی دفاتر کو بھیج دیا گیا، جس کے مطابق نئی پالیسی کے تحت شہریوں کو حدود کے دائرہ اختیار میں نرمی دی جائے گی۔قومی ایئرلائن (پی آئی اے) کی نجکاری کا عمل شروع ہوگیا، نیلامی کیلئے بولی کھول دی گئی، جو 10 ارب روپے لگائی گئی ہے۔حکومت نے پی آئی اے کی کم از کم قیمت 85 ارب 3 کروڑ روپے مقرر کی تھی، بولی دہندہ کو سرکاری قیمت میں خریدنے کیلئے 30 منٹ کا وقت دے دیا گیا۔یاد رہے کہ پی آئی اے کی نجکاری کیلئے صرف ایک کمپنی نے بولی میں حصہ لیا، بولی کا عمل سرکاری ٹی وی پر براہ راست دکھایا گیا۔ نجکاری کمیشن ذرائع کے مطابق بلیو ورلڈ ایوی ایشن کنسورشیم کے ساتھ معاہدے کے اہم خد و خال پر نجکاری کمیشن متفق ہے۔ پی آئی اے کے ملازمین کو 18 ماہ تک ملازمت پر رکھا جائے گا، اس کے بعد تقریباً 70 فیصد تک ملازمین کو ازسر نو جاب لیٹر آفر ہوں گے۔سرمایہ کار کمپنی پانچ برسوں میں 30 کروڑ ڈالر کی سرمایہ کاری کرے گی اور جہازوں کی تعداد 45 تک بڑھائی جائے گی، پی آئی اے تمام روٹس پر اپنی سروسز کو بحال کرے گی۔بلیو ورلڈ سٹی کنسورشیم کے ساتھ بولی فائنل کرنے کیلئے مذاکرات بھی کیے جا سکتے ہیں جن میں بولی کم ہونے کی صورت میں بلیو ورلڈ سٹی کنسورشیم کو مختلف آپشنز دیے جائیں گے، سنگل بڈرز کیساتھ بولی کامیاب کرنے کیلئے رولز میں ترامیم بھی کی گئی۔وزیراعظم شہباز شریف کی قطر کے امیر شیخ تمیم بن حمد آل ثانی سے ملاقات ہوئی، جس میں تجارت، سرمایہ کاری، توانائی اور ثقافت کے شعبوں میں تعاون پر غور کیا گیا۔دوحا میں وزیراعظم شہباز شریف نے قطر کے امیر سے وفود کی سطح پر ملاقات کی، دونوں رہنماؤں کے درمیان ون آن ون ملاقات بھی ہوئی، جس میں دو طرفہ تعلقات کے وسیع معاملات پر تبادلہ خیال کیا گیا۔وزیراعظم شہباز شریف اور امیر قطر نے پاک قطر تعلقات کے پہلوؤں کاجائزہ لیا، فریقین نے مشترکہ اقتصادی اہداف اور علاقائی استحکام کی اہمیت پر زور دیا۔ وزیراعظم اور امیر قطر نے علاقائی، عالمی امور پر بھی تبادلہ خیال کیا، اسرائیل کی فلسطینیوں کے خلاف جاری نسل کشی، خطے میں کشیدگی بڑھنے پر بھی گفتگو کی گئی۔شہباز شریف نے امیر قطر کی طرف سے فلسطین کے معاملے پر قطر کے مؤقف کی تعریف کی، وزیراعظم نے فوری جنگ بندی کیلئے قطر کی ثالثی، انسانی امداد کی فراہمی کو سراہا۔

: 31 اکتوبر 2024 *_وزیراعظم محمد شہباز شریف کی قطر کے امیر عزت مآب شیخ تمیم بن حمد آل ثانی سے ملاقات_*وزیر اعظم محمد شہباز شریف نے قطر کے امیر عزت مآب شیخ تمیم بن حمد آل ثانی سے آج دوحہ میں وفود کی سطح پر ملاقات کی ۔ اس سے قبل دونوں رہنماؤں کے درمیان ون آن ون ملاقات بھی ہوئی جس میں دو طرفہ تعلقات کے وسیع معاملات پر تبادلہء خیال ہوا۔ دونوں رہنماؤں نے پاکستان قطر تعلقات کے تمام پہلوؤں کا جائزہ لیا. تجارت، سرمایہ کاری، توانائی اور ثقافت کے شعبوں میں تعاون بڑھانے کے لیے نئے ممکنہ تعاون پر غور کیا گیا۔ دونوں فریقین نے مشترکہ اقتصادی اہداف اور علاقائی استحکام کی اہمیت پر زور دیتے ہوئے اسٹریٹجک تعلقات کو گہرا کرنے کے عزم کا اعادہ کیا۔ دونوں رہنماؤں نے باہمی دلچسپی کے علاقائی اور بین الاقوامی امور بالخصوص اسرائیل کی طرف سے بے گناہ فلسطینیوں کے خلاف جاری نسل کشی کی جنگ اور خطے میں کشیدگی میں اضافے پر بھی تبادلہ خیال کیا۔ وزیر اعظم نے 24 ستمبر 2024 کو منعقدہ 79 ویں یو این جی اے کے دوران عزت مآب امیر قطر کی طرف سے فلسطین کے معاملے پر قطر کے موقف کی تعریف کی۔ انہوں نے فوری جنگ بندی کے لئے قطر کی ثالثی اور انسانی امداد کی بلا تعطل فراہمی کی کوششوں کو سراہا۔ وزیراعظم نے کہا کہ غزہ میں فوری طور پر قتل و غاری گری اور امن قائم کرنے کے بغیر دنیا میں خوشحالی کا حصول ممکن نہیں ہوسکتا۔ ان کا کہنا تھا فلسطین میں جاری اسرائیلی کی حالیہ بربریت کی تاریخ میں مثال نہیں ملتی۔ انہوں نے فلسطینی بھائیوں اور بہنوں کے لیے مزید امدادی سامان کی ترسیل کو جاری رکھنے کی اہمیت پر بات کی۔ وزیراعظم نے امیر قطر کو پاکستان کے دورے کی دعوت بھی دی.وزیر اعظم کا دورہ پاکستان اور قطر کے درمیان مسلسل مضبوط ہونے والی شراکت داری اور تعاون کو وسعت دینے میں ایک اور سنگ میل ہے۔ ***