الیکشن کمیشن میں وزیر اعلیٰ سہیل آفریدی کے خلاف کیس کی سماعت مکمل ہونے پر فیصلہ محفوظ کرلیا گیا۔۔۔ وزیر اعلیٰ سہیل آفریدی کے وکیل علی بخاری کے دلائل کے بعد فیصلہ محفوظ ہوا۔ علی بخاری نے مؤقف اپنایا کہ وہ پہلے ہی تفصیلی دلائل دے چکے ہیں اور آج درخواست گزار اور کمیشن کے وکلاء کے سوالات کے جواب دیں گے۔ انہوں نے کہا کہ کمیشن نے کبھی پی ٹی آئی کے حق میں کوئی فیصلہ نہیں کیا، جبکہ کمیشن کے وکیل کے مطابق سہیل آفریدی کی رکنیت معطل ہو سکتی ہے۔ اس پر علی بخاری نے کہا کہ معطلی کی اتنی جلدی کیا ہے اور یاد دلایا کہ پشاور ہائیکورٹ نے سہیل آفریدی کے خلاف کسی بھی آرڈر سے کمیشن کو روک رکھا ہے۔ ان کا کہنا تھا کہ الیکشن کمیشن کے پاس اختیار نہیں کہ ڈی ایم او کی کارروائی کے ساتھ خود بھی کارروائی کرے کیونکہ ڈی ایم او کو خود کمیشن نے مقرر کر کے کارروائی کی اجازت دی۔علی بخاری نے مؤقف اختیار کیا کہ ایسا نہیں ہو سکتا کہ ڈی ایم او کی کارروائی شروع ہوتے ہی کمیشن خود نوٹس لے اور یہ بھی کہا کہ واقعہ ہری پور میں پیش نہیں آیا۔ ان کا کہنا تھا کہ اگر کسی اور ضلع میں خطاب پر نوٹس لینا ہے تو وزیراعظم کو بھی بلایا جائے۔ ممبر سندھ الیکشن کمیشن نے ریمارکس دیے کہ یہ کیس صرف ضابطہ اخلاق کی خلاف ورزی کا نہیں بلکہ دھمکانے کا بھی ہے۔ علی بخاری نے جواب دیا کہ ان کے موکل نے ضابطہ اخلاق کے کسی نکتے کی خلاف ورزی نہیں کی اور اگر کارروائی کرنی ہے تو وزیر اعلیٰ پنجاب کے خلاف دائر درخواست پر بھی کی جاتی۔ چیف الیکشن کمشنر نے استفسار کیا کہ کیا اپنی درخواست مسترد کرنے کے کمیشن کے آرڈر کو چیلنج کیا گیا، جس پر علی بخاری نے کہا کہ انہوں نے چیلنج نہیں کیا بلکہ اس آرڈر کو مثال کے طور پر پیش کر رہے ہیں۔سماعت کے دوران چیف الیکشن کمشنر نے ریمارکس دیے کہ وزیر اعلیٰ پنجاب کی مثال اس کیس سے مماثلت نہیں رکھتی اور درخواست مسترد ہونے کے خلاف اعلیٰ عدلیہ سے رجوع کرنا چاہیے تھا۔ علی بخاری نے کہا کہ سہیل آفریدی نے عوامی اجتماع میں سیاسی خطاب کیا اور انتظامیہ یا عملے کو نہیں دھمکایا۔ چیف الیکشن کمشنر نے سوال اٹھایا کہ عوامی اجتماع ہو یا بند کمرہ، وہ بطور وزیر اعلیٰ ہی بات کر رہے ہوتے ہیں۔ ممبر کے پی کے نے استفسار کیا کہ کیا یہ دھمکی نہیں بلکہ بددعا تھی۔ چیف الیکشن کمشنر نے کہا کہ کمیشن نے پی ٹی آئی ارکان کے ڈفیکشن کیس میں جماعت کے حق میں بھی فیصلہ دیا تھا۔ دلائل مکمل ہونے پر الیکشن کمیشن نے فیصلہ محفوظ کرلیا۔
