بانی پی ٹی آئی کی ہمیشرہ علیمہ خان نے کہا ہے کہ عمران خان نے 15 دسمبر کو یوم شہداء کا دن مقرر کرنے کا اعلان کیا ہے، پشاور سمیت دنیا بھر میں کارکنان دعا کریں گے۔انہوں نے کہا کہ جیل میں بات چیت کے دوران پتا چلا کہ بانی پی ٹی آئی کو معلوم نہیں تھا کہ ڈی چوک اسلام آباد میں کتنی شہادتیں ہوئیں اور کتنے لوگ زخمی ہوئے ہیں؟گفتگو کے دوران انہوں نے کہا کہ بانی کو علم نہیں تھا کہ کتنے کارکنان لاپتا ہیں، بانی پی ٹی آئی نے اس بات پر افسوس کا اظہار کیا کہ ابھی تک 200 سے زائد کارکنان لاپتہ ہیں، وہ لاپتہ کارکنان کے حوالے سے فکر مند ہیں۔ان کا کہنا تھا کہ بانی پی ٹی آئی کا کہنا ہے کہ ”کفر کا نظام چل سکتا ہے، لیکن ظلم کا نہیں“، ہم اس نظام کو قبول نہیں کریں گے، 9 مئی کے بعد اب 26 نومبر کا مطالبہ بھی مطالبات میں شامل کر لیا گیا ہے۔عمران خان سے ملاقات کے بعد اڈیالہ جیل کے باہر میڈیا سے گفتگو کے دوران انہوں نے بتایا کہ بانی نے اوورسیز پاکستانیوں کو ملک میں رقوم بھیجنے سے روک دیا ہے۔انہوں نے کہا کہ بانی پی ٹی آئی نے مطالبہ کیا ہے کہ سپریم کورٹ کے تین سینئر ججوں پر مشتمل جوڈیشل کمیشن قائم کیا جائے، دونوں سانحات کی سی سی ٹی وی فوٹیجز کے بغیر تحقیقات ممکن نہیں، گرفتار کارکنان کو رہا کیا جائے ، غیرقانونی مقدمات فوری ختم کئے جائیں۔علیمہ خان نے مزید کہا کہ بانی پی ٹی آئی سے گفتگو موجودہ سیاسی حالات کے تناظر میں کی گئی، جس میں انہوں نے کارکنان کے مسائل اور حقوق پر زور دیا گیا ۔

وزیر دفاع خواجہ آصف نے قومی اسمبلی میں پی ٹی آئی پر کڑی تنقید کرتے ہوئے کہا کہ 26 نومبر کو ہونے والے واقعات میں ہلاک ہونے والوں کی تعداد اور ان کے بارے میں کسی بھی قابلِ اعتبار معلومات کا فقدان ہے۔ انہوں نے کہا کہ پی ٹی آئی نے جن 12 ہلاک ہونے والے افراد کا ذکر کیا، ان کے شناختی کارڈ، قبریں یا ورثا کا کوئی ثبوت سامنے نہیں آیا۔ خواجہ آصف نے پی ٹی آئی کی قیادت میں موجود تضادات کی نشاندہی کرتے ہوئے کہا کہ لطیف کھوسہ نے 278 افراد کے مرنے کا دعویٰ کیا تھا، جبکہ ایوان میں بیٹھے دیگر رہنماؤں نے مختلف تعدادیں پیش کیں۔ انہوں نے مزید کہا کہ پی ٹی آئی کے اندر شدید اختلافات ہیں، جس کی جھلک عمر ایوب کی تقریر میں نظر آئی، جہاں وہ نے کہا کہ بشریٰ بی بی کے ساتھ باقی لوگ بھاگ گئے۔ وزیر دفاع نے پی ٹی آئی کے رہنما علی امین گنڈاپور پر حملے کا ذکر بھی کیا اور دعویٰ کیا کہ ان کے گارڈز نے حملہ آوروں پر فائرنگ کی۔ خواجہ آصف نے اس بات کو قوم کے اجتماعی شعور کی توہین قرار دیتے ہوئے کہا کہ بغیر ثبوت کے ایسی باتیں کرنا گمراہ کن ہے