جماعت اسلامی آزاد جموں و کشمیر کے سابق امیر عبد الرشید ترابی نے کہا ہے کہ پاکستان کشمیری عوام کا وکیل ہے اور ہمیں پاکستان میں وہ فیصلے کرنے ہیں جن سے کشمیری عوام کی تحریک آزادی کامیابی کے ساتھ ہمکنار ہو‘ اہل قلم کی ذمہ داری ہے کہ وہ اس محاذ پر کشمیرری عوام کی تحریک آزادی کے خلاف ہونے والے لغو اور بے بنیاد پراپیگنڈے کا توڑ کریں‘

انہوں نے یہ بات ممتاز اخبار نویس سید سعود ساحر مرحوم کی چوتھی برسی کے موقع پر ہونے والی تقریب سے اظہار خیال کرتے ہوئے کہی برسی کی تقریب میں مسلم کانفرنس کے راہنماء سردار محمد عثمان خان‘ تحریک انصاف کے راہنماء سابق ایم این اے انوار الحق رامے‘ اٹک چیمبر آف کامرس کے بانی چیئرمین مرزا عبد الرحمن‘ فیڈر یشین آف چیمبرز آف کامرس اینڈ انڈسٹریز کے سابق نائب صدر سجاد سرور‘ پیپلزپارٹریڈرز سیل کے راہنماء عمران شبیر عباسی‘ فیڈریشن آف رئیلٹرز پاکستان کے مرکزی راہنماء اسرار الحق مشوانی‘ پاکستان پیپلزپارٹی ورکرز کے فنانس سیکرٹری ابن رضوی‘ گورڈن کالج کی سٹوڈنٹ کی یونین کے سابق صدر سابق طالب علم راہنماء سہیل مہدی‘ سینسر بورڈ کے ممبر ندیم ہرل‘ گیسٹ ہاؤسز ایسو سی ایشن کے بانی چیئرمین اظہر شیخ‘ کرنل(ر) احمد سعود‘ حکیم محمود احمد سرو سہارن پوری اور دیگر نے بھی اظہار خیال کیا‘ اور تقریب میں وکلاء‘ تاجروں‘ سول سوسائٹی‘ سیاسی کارکنوں اور اخبار نویسوں کی بڑی تعداد شریک ہوئی جماعت اسلامی پاکستان کے امیر حافظ نعیم الرحمن خان‘موئتمر عالم اسلامی کے سیکرٹری جنرل راجا محمد ظفر الحق اور پاکستان مسلم لیگ(ض) کے سربراہ محمد اعجاز الحق نے اپنا پیغام بھیجا‘ عبد الرشید ترابی نے کہا کہ اقوام عالم میں پاکستان میں کشمیری قیادت کو اس وقت مشکل پیش آتی ہے کہ جب ہم بیرون ملک جاکر مقبوضہ کشمیر میں بھارت کے مظالم کا ذکر کرتے ہیں

تو عالمی راہنماؤں کی طرف سے جواب دیا جاتا ہے کہ پاکستان میں بھی انسانی حقوق کی ایسی ہی صورت حال ہے‘ انہوں نے کہا کہ حالیہ دنوں میں جس طرح آئین میں ترمیم کی گئی ہے یہ کبھی کسی مہذب جمہوری معاشرے میں ایسے نہیں ہوتا ہے‘ انہوں نے کہا کہ ہم پاکستان میں اپنے حالات درست کرکے ہی عالمی سطح پر کشمیر کا مقدمہ بہتر انداز میں پیش کر سکتے ہیں‘ موئتمر عالم اسلامی کے سیکرٹری جنرل راجا محمد ظفر الحق اپنے پیغام میں کہا کہ سعود ساحر کی خوبی یہی تھی کہ وہ جابر سلطان کے سامنے کلمہ حق کہنے کی جرئت رکھتے تھے‘ جماعت اسلامی پاکستان کے امیر حافظ نعیم الرحمن نے کہا کہ سعود ساحر کو ہم نے پڑھا ہے اور ان کی تحریروں میں بہت جان اور کردار اور سچائی جھلکتی تھی‘ مسلم لیگ(ض) کے سربراہ ایم این اے محمد اعجاز الحق نے کہا کہ سعود ساحر جیسے لوگ ہماری قومی قومی صحافت کا بہترین اثاثہ ہیں‘ مسلم کانفرنس کے راہنماء سردار محمد عثمان خان نے کہا کہ ہم نے سعود ساحر کی صحافت میں جرات اور بے باکی دیکھی ہے اور ان سے بہت کچھ سیکھنے کو ملا‘ ریاست آزاد و جموں کشمیر کے سابق صدر اور سابق وزیر اعظم مسلم کانفرنس کے سپریم کمانڈر مجاہد اول سردار عبد القیوم خان کے ساتھ ان کی رفاقت قابل رشک تھی‘ انہوں نے کہا کہ ہم نے ان کی صحافت میں اسلام‘ پاکستان اور کشمیر کو دیکھا وہ واقعی ایک نظریاتی شخصیت تھے تحریک انصاف کے راہنماء اور سابق ایم این اے انوار الحق رامے نے کہا کہ سعود ساحر نے اپنے کردار سے خود کو ایک کھر صحافی ثابت کیا ہے

انہوں نے کہا کہ ہمیں اپنے پروفیشن میں ایک کھرا کردار دکھانے کی ضرورت ہے اور اس کی بہت اہمیت ہے‘ حکیم محمد محمود سہارن پوری نے کہا کہ سعود ساحر نے بہت مشکل حالات میں صحافت کا پیشہ اختیار کیا تھا لیکن اس پیشے میں انہوں نے اپنا نام کمایا اور جرائت کے ساتھ اپنے کالموں میں نکتہ نظر پیش کیا اور خبر میں کبھی بزدلی نہیں دکھائی‘ انہوں نے ہمیں جینے کا ڈھنگ سکھایا اور اپنے کردار سے ثابت کیا کہ حالات کا مقابلہ کرنے کے لیے کیسی حکمت عملی اختیار کرنے کی ضرورت ہوتی ہے‘ ابن رضوی نے کہا کہ سعود ساحر ایک عظیم صحافی تھے اور انہوں نے جرائت مندی کے ساتھ اپنی پروفیشنل ذمہ داری نبھائی‘ وہ تعلقات سب کے ساتھ رکھتے تھے مگر اپنی خبر میں کسی کے ساتھ رعائت نہیں کرتے تھے‘ میرا تعلق پیپلزپارٹی سے رہا‘ وہ ہمارے نظریاتی مخالف تھے مگر ہمارے ساتھ ان کا اخلاق بہت اچھا تھا‘گورڈن کالج کی سٹوڈنٹ کی یونین کے سابق صدر سابق طالب علم راہنماء سہیل مہدی نے کہا کہ ہمیں اپنے اسلاف کے بہترین کارنامے اپنے نوجوانوں تک منتقل کرنے چاہیے تاکہ ہماری نوجوان نسل بھی اپنے اندر ایسی جرائت اور بے باکی پیدا کرے‘ فیڈریشن آف رئیلٹرز پاکستان کے مرکزی راہنماء اسرار الحق مشوانی نے کہا کہ ہم نے سعود ساحر کی صحافت میں جرات دیکھی‘ وہ خبر میں سچائی بیان کرتے تھے اور کسی کا لحاظ نہیں کرتے تھے‘ سعود ساحر کے صاحب زادے احمد سعود نے تقریب کے شرکاء کا شکریہ ادا کیا اور کہا کہ ہم نے انہیں بطور والد اور بطور انسان بہت اعلی شخصیت کے طور دیکھا ہے اور عملی طور پر نہائت قابل رشک انسان تھے انہوں نے ہمیں حق کے لیے دٹ جانے اور کمزوروں کے لیے شفقت کرنے کا درس دیا تقریب میں سعود ساحر اور دیگر مرحومین کی مغفرت کی دعاء کی گئی

پاکستان کشمیری عوام کی تحریک آزادی کی کامیابی کے لیے عالمی سطح پر بھارت نواز لابی کا توڑ کرے‘ ترابی سعود ساحر کی صحافت میں جرائت اور بے باکی پائی جاتی تھی‘ سردار محمد عثمان خان ہما رے بزرگوں نے ہمیں جینے کا سلیقہ سکھایا‘ حکیم محمود احمد سرو سہارن پوری کسی بھی انسان پر بات کرنے کے لیے اولین بات اس کا کردار ہوتا ہے‘ انوار الحق رامے سعود ساحر ایک نظریاتی صحافی تھے‘ ابن رضوی ہمیں اپنے اسلاف کے کارناموں کو نوجوان نسل تک منتقل کرنا چاہیے‘ سہیل مہدی ممتاز اخبار نویس سعود ساحر کی چوتھی برسی کی تقریب سے مقررین کا اظہار خیال

وزیراعلیٰ خیبر پختونخوا علی امین گنڈاپور نے گرفتاری کے بعد رہا ہونے والے سرکاری ملازمین کے لیے ون سٹیپ پروموشن کا اعلان کر دیا۔پی ٹی آئی کے ڈی چوک احتجاج میں گرفتار سرکاری ملازمین رہائی کے بعد پشاور پہنچ گئے۔علی امین گنڈاپور نے رہا ہونے والے ملازمین کا استقبال کیا اور پھولوں کے ہار بھی پہنائے۔وزیر اعلیٰ نے سرکاری ملازمین کو ایک ہفتے کی چھٹی کی ساتھ 10 ہزار روپے سٹائپنڈ بھی دے دیا۔واضح رہے کہ احتجاج کے دوران گرفتار ہونے والے سرکاری ملازمین میں 34 پولیس اہلکار، 7 ٹی ایم اے اور 42 ریسکیو اہلکار شامل تھے۔

عافیہ صدیقی کی رہائی کیلیے امریکا بھیجے جانے والے وفد کی تفصیلات اسلام آباد ہائیکورٹ میں پیشعافیہ صدیقی کی صحتیابی اور وطن واپس لانے سے متعلق ڈاکٹر فوزیہ صدیقی کی درخواست پر سماعت ہوئی۔ اسلام آباد ہائیکورٹ کے جسٹس سردار اعجاز اسحاق خان نے کیس کی سماعت کی۔ اٹارنی جنرل اف پاکستان اور ڈاکٹر فوزیہ صدیقی کے وکیل عمران شفیق عدالت میں پیش ہوئے۔اٹارنی جنرل نے تفصیلات پیش کرتے ہوئے بتایا کہ 4 رکنی وفد امریکا جائے گا جس میں سینیٹر طلحہٰ محمود، فوزیہ صدیقی ، انوشے رحمان اور ایک ڈاکٹر شامل ہوگا جبکہ ڈاکٹر فوزیہ صدیقی اور ڈاکٹرز بھی وفد کا حصہ ہوں گے۔ امید ہے وفد اگلے دو ہفتوں تک امریکا کے آفیشلز کے ساتھ میٹنگ کرے گا اور امریکی الیکشنز کے فوراً بعد وفد امریکا جائے گا۔عدالت نے وکیل زینب جنجوعہ ایڈووکیٹ کو دونوں فریقین کا فوکل پرسن مقرر کر دیا۔اٹارنی جنرل نے کہا کہ ڈاکٹر فوزیہ جس ڈاکٹر کو لے کر جانا چاہتی ہیں اس کی ویزا پوزیشن کیا ہے۔ ڈاکٹر فوزیہ صدیقی نے کہا کہ میرے خیال میں ڈاکٹر کے پاس ویزا ہے۔ جسٹس سردار اعجاز اسحاق خان نے اٹارنی جنرل کی تعریف کرتے ہوئے کہا کہ ویری گڈ اٹارنی جنرل صاحب آپ معاملے میں شامل ہوئے۔عدالت نے کیس کی سماعت نومبر کے آخر تک ملتوی کر دی۔

پاک بحریہ کے جہاز پی این ایس ذوالفقار نے خلیج عدن میں 23 ایرانی ماہی گیروں کو بچا لیا۔ پاک فوج کے شعبہ تعلقات عامہ آئی ایس پی آر کے مطابق پی این ایس ذوالفقار ریجنل میری ٹائم سیکیورٹی پٹرولنگ پر تھی کہ ایرانی ماہی گیر کشتی کی جانب سے ہنگامی مدد کی کال موصول ہوئی۔ آئی ایس پی آر کے مطابق ایرانی کشتی اپنی بندرگاہ سے 1200 ناٹیکل میل پر تھی، ایرانی کشتی نے ایک رکن کے شدید زخمی ہونے اور انجن کے خراب ہونے کی اطلاع دی تھی۔آئی ایس پی آر نے بتایا کہ پی این ایس ذوالفقار کے عملے نے ایرانی ماہی گیروں کو طبی امداد دی اور عملے نے تکنیکی مدد فراہم کرتے ہوئے انجن کی مرمت بھی کی۔آئی ایس پی آر نے بتایا کہ تعیناتی کے دوران پاک بحریہ کے جہاز سمندر میں متاثرہ بحری جہازوں کو ریسکیو کرتے ہیں۔ امدادی آپریشن بحری جہازوں کی حفاظت اور سلامتی کےلیے پاک بحریہ کے عزم کو ظاہر کرتا ہے۔

پاکستان تحریک انصاف (پی ٹی آئی) کے سیکریٹری جنرل سلمان اکرم راجہ نے شیر افضل مروت کو وارننگ دیتے ہوئے کہا کہ شیر افضل مروت کو موقع دے رہے ہیں ڈسپلن کا مظاہرہ نہیں کیا تو کارروائی کریں گے۔لاہور میں میڈیا سے گفتگو کرتے ہوئے سلمان اکرم راجہ نے کہا کہ 26ویں آئینی ترمیم پاکستان کے آئین اور عدلیہ پر حملہ ہے، تحریک انصاف اس کے خلاف بھر پور مزاحمت کرے گی۔انہوں نے مزید کہا کہ دھرنے اور احتجاج سے متعلق ہمارا پلان ہے، ہم بہت جلد ملک گیر احتجاج کا اعلان کریں گے۔پی ٹی آئی رہنما نے کہا کہ بانی چیئرمین پی ٹی آئی کے ساتھ غیر انسانی سلوک کیا جا رہا ہے، بشریٰ بی بی کا سیاست میں کردار ادا کرنے کا کوئی ارادہ نہیں۔