سعودی عرب : ولی عہد شہزادہ محمد بن سلمان کی سربراہی میں کابینہ کی دوبارہ تشکیل شہزادہ عبدالعزیز بن سلمان لوکل کنٹینٹ اینڈ گورنمنٹ پروکیورمنٹ اتھارٹی کے بورڈ آف ڈائریکٹرز کے چیئرمین مقرر,شاہی فرمان سعودی عرب کے فرماں روا شاہ سلمان بن عبدالعزیز نے آج 3 شاہی فرامین جاری کیے ہیں۔فرامین میں کابینہ کی تشکیل کا فیصلہ آئندہ چار سال کے لیے طے شدہ مدت کی بنیاد پر کیا گیا ہے، جس کے تحت ولی عہد اور وزیر اعظم شہزادہ محمد بن سلمان کی سربراہی میں موجودہ اراکین پر مشتمل کابینہ کی دوبارہ تشکیل کی گئی ہے۔ یہ فیصلہ کابینہ کی تشکیل سے متعلق جاری کردہ شاہی فرامین، متعلقہ دیگر فرامین اور کابینہ کے نظام کی دفعہ (9) کے جائزہ کے بعد عمل میں آیا ہے۔ اس میں واضح ہے کہ کابینہ کی مدت چار سال سے زیادہ نہیں ہو گی اور اس کے دوران شاہی فرمان کے ذریعے اس کی دوبارہ تشکیل کی جا سکتی ہے۔اسی طرح شاہی فرامین میں شہزادے عبدالعزیز بن سلمان کو لوکل کنٹینٹ اینڈ گورنمنٹ پروکیورمنٹ اتھارٹی کے بورڈ آف ڈائریکٹرز کا نیا چیئرمین مقرر کیا گیا ہے۔ اتھارٹی کے بورڈ آف ڈائریکٹرز کے چیئرمین بندر الخریف کو ان کے عہدے سے سبکدوش کر دیا گیا ہے۔نیز کیپٹل مارکیٹ اتھارٹی کے بورڈ کے چیئرمین محمد القویز کو بھی ان کے عہدے سے سبکدوش کر دیا گیا ہے۔ ان کی جگہ مازن السدیری کو وزیر کے درجے میں کیپٹل مارکیٹ اتھارٹی کے بورڈ کا نیا چیئرمین مقرر کیا گیا ہے۔
