پنجاب بھر میں دفعہ 144 نافذ۔ تفصیلات کے مطابق مریم نواز کی پنجاب حکومت نے صوبے بھر میں ہر قسم کے احتجاج، جلسے جلوسوں پر پابندی عائد کر دی ہے۔ صوبائی حکومت کی جانب سے جاری نوٹیفیکیشن کے مطابق صوبے بھر میں 2 روز کیلئے دفعہ 144 نافذ رہے گی۔ فیصلے کے تحت صوبے میں کسی بھی مقام پر احتجاج، جلسے اور جلوسوں کی اجازت نہیں ہو گی۔پنجاب حکومت کی جانب سے یہ فیصلہ ایسے وقت میں کیا گیا ہے کہ جب ایک جانب لاہور کے نجی کالج میں طالبہ کے مبینہ ریپ کے واقعے پر طلبا احتجاج کر رہے ہیں تو دوسری جانب تحریک اںصاف نے بھی مجوزہ آئینی ترمیم کیخلاف ملک بھر میں احتجاج کی کال دے دی ہے۔ پاکستان تحریک انصاف نے دستور میں ترمیم کے حکومتی منصوبے کی بھرپور مزاحمت کا فیصلہ کرلیا ہے، جس کے تحت پی ٹی آئی کی سیاسی کمیٹی نے آئین میں ترمیم اور بانی چیئرمین عمران خان کو بدترین سلوک کا نشانہ بنائے جانے کے خلاف جمعتہ المبارک کو ملک گیر سطح پر شدید احتجاج کا اعلان کیا ہے۔پی ٹی آئی کی سیاسی کمیٹی کے اعلامیہ کے مطابق پاکستان تحریک انصاف نے آئینی ترمیم کے حکومتی منصوبے کے خلاف جمعتہ المبارک کو ملک گیر سطح پر شدید احتجاج کا اعلان کیا ہے۔ سیاسی کمیٹی کی جانب سے اڈیالہ میں قید بانی چیئرمین تحریک انصاف عمران خان سے روا رکھی جانے والی زیادتیوں کی شدید مذمت کی گئی۔ عمران خان کے بنیادی حقوق کی اور ان تک اہلِ خانہ، وکلاء اور تحریکی قائدین کی رسائی کی فوری بحالی کا بھی مطالبہ کیا گیا۔تمام ریجنل اور مقامی تنظیمات کو تمام ضلعی ہیڈکوارٹرز پر نمازِ جمعہ کے بعد بھرپور مگر پُرامن احتجاج کی ہدایت کی گئی ہے۔ آئینی ترمیم کے ذریعے دستور کو مسخ کرنے کی حکومتی کوشش کو کسی طور پر قبول نہ کرنے پر مکمل اتفاق کیا گیا۔ آئین کی بالادستی پر یقین رکھنے والے تمام طبقات کو پرامن احتجاج میں شرکت کی اپیل کی گئی ہے۔ اجلاس میں پارلیمان کے دونوں ایوانوں میں ترمیم کا راستہ روکنے کیلئے بھی ہر ممکن کوشش پر اتفاق کیا گیا۔اعلامیہ کے مطابق سیاسی کمیٹی کی جانب سے بانی چیئرمین عمران خان کی بہنوں علیمہ خانم اور عظمیٰ خانم کی فوری رہائی کا مطالبہ کیا گیا۔ انتظار حسین پنجوتھہ ایڈووکیٹ، اعظم سواتی اور تحریک انصاف بلوچستان کے صدر سمیت تمام گرفتار قائدین، کارکنان اور اراکینِ پارلیمان کی فوری رہائی پر بھی زور دیا گیا ہے۔
