اتوار، 4 اگست 2024:وفاقی وزیر برائے سمندری امور جناب قیصر احمد شیخ نے ایکسپو سینٹر کراچی میں *19ویں مائی کراچی اویسس آف ہارمنی* کے ایونٹ میں بحیثیت مہمان خصوصی شرکت کی۔

نمائش میں متعدد مقامی اور بین الاقوامی برانڈز نے شرکت کی۔ اس کے علاوہ، کراچی چیمبر آف کامرس اینڈ انڈسٹری کے صدر جناب افتخار شیخ، ٹی ڈی اے پی کے چیف ایگزیکٹو جناب زبیر موتی والا، جناب انجم نثار اور کے سی سی آئی کے موجودہ اور سابقہ عہدیداران سمیت کراچی کے معروف کاروباری شخصیات نے بھی شرکت کی۔

حکومت نے کل قومی اسمبلی سے الیکشن ایکٹ ترمیمی بل 2024ء کی منظوری لینے کا فیصلہ کر لیا۔قومی اسمبلی کا اجلاس سپیکر سردار ایاز صادق کی زیر صدارت کل ساڑھے 11بجے طلب کیا گیا ہے، الیکشن ایکٹ 2017ء میں مزید ترمیم کا بل منظوری کے لئے پیش کیا جائے گا، پاسپورٹس کے اجرا میں غیر معمولی تاخیر کی شکایات پر توجہ دلاؤ نوٹس ایوان میں پیش کیا جائے گا۔تیزاب سے جلاؤ کی روک تھام اور منصفانہ اور جلد ٹرائل کو یقینی بنانے کے لئے بل پیش کیا جائے گا، قومی کمیشن برائے حقوق اطفال ترمیمی بل 2024ء قومی اسمبلی میں پیش کیا جائے گا، بچوں کی شادیوں پر پابندی عائد کرنے کا بل ایوان میں پیش کیا جائے گا۔راوی انسٹیٹیوٹ ساہیوال بل 2024ء بھی قومی اسمبلی میں پیش کیا جائے گا، قومی اسمبلی میں قواعد و ضوابط اور طریقہ کار میں ترمیم کی تحریک ایوان میں پیش کی جائے گی، آئی پی پیز کے ساتھ معاہدوں پر نظرثانی کی قرارداد پیش کی جائے گی۔حج کے اخراجات میں کمی کی قرارداد بھی ایوان میں پیش کی جائے گی، نوجوانوں میں آئی ٹی بزنس کے فروغ کے لئے آئی ٹی پارکس کے قیام کی قراداد پیش کی جائے گی، پاکستان نرسنگ کونسل کے آڈٹ کی قرارداد بھی ایوان میں پیش کی جائے گی، ڈسکوز کی کارکردگی اور پٹرولیم سیکٹر میں گردشی قرضے کی صورتحال پر بحث کی تحریک بھی پیش کی جائے گی۔اشیائے ضروریہ کی قیمتوں میں اضافے پر توجہ دلاؤ نوٹس ایوان میں پیش کیا جائے گا۔

بنگلہ دیش میں طلبہ تحریک نے ملک گیر سِول نافرمانی کی کال دے دی ہے۔ طلبہ تحریک سے وابستہ طلبہ کا کہنا ہے کہ حکومت وعدہ خلافی کر رہی ہے۔ کئی شہروں میں ہنگامے پھوٹ پڑے ہیں جن میں 27 افراد جبکہ بعض رپورٹوں کے مطابق 50 افراد مارے گئے ہیں۔جن لوگوں کو طلبہ تحریک کے دوران گرفتار کیا گیا تھا اُنہیں رہا کرنے پر اتفاق ہوا تھا مگر اب حکومت اُن کے خلاف مقدمات چلانے کی تیاری کر رہی ہے۔طلبہ تحریک کے قائدین کو رہا کرنے سے حکومت کے انکار نے طلبہ میں ایک بار پھر اشتعال کی لہر دوڑا دی ہے۔ انہوں نے اپنی تحریک دوبارہ شروع کرنے کی تیاری کو حتمی شکل دینا شروع کردیا ہے۔عوام سے کہا گیا ہے کہ وہ طلبہ کا ساتھ دیں اور حکومت کے خلاف تحریک کا حصہ بنیں۔ اس سلسلے میں سول نافرمانی کا آپشن اختیار کیا جارہا ہے۔سیاسی امور کے تجزیہ کاروں کا کہنا ہے کہ بنگلہ دیشی حکومت کو اس مرحلے پر افہام و تفہیم سے کام لینا ہے۔ اگر طلبہ تحریک کے قائدین کے خلاف مقدمات چلا کر اُنہیں سزائیں سنائی گئیں تو ملک ایک بار پھر طویل عدم استحکام کا شکار ہو سکتا ہے۔