تحریک انصاف پر پابندی اور مخصوص نشستوں کے معاملے پر ایوان صدر میں مسلم لیگ ن اور پیپلز پارٹی کا اہم مشاورتی اجلاس ہوا۔ ذرائع کے مطابق اجلاس میں پیپلز پارٹی اور مسلم لیگ ن کے اہم رہنماؤں نے شرکت کی، اجلاس میں پی ٹی آئی پر پابندی کے معاملے پر گفتگو ہوئی۔ پیپلز پارٹی کے ذرائع کے مطابق مشاورتی اجلاس میں مخصوص نشستوں اور دیگر اہم معاملات پر بھی گفتگو ہوئی۔ پیپلز پارٹی کے ذرائع کے مطابق پیپلز پارٹی ہر آئینی اور قانونی فیصلے کے ساتھ کھڑی ہوگی۔ ذرائع نے بتایا کہ مشاورتی اجلاس میں گفتگو کے دوران کہا گیا کہ تحریک انصاف کا رویہ جمہوری نہیں ہے۔ پی ٹی آئی خود کو سیاسی جماعت کہتی ہے تو رویہ بھی سیاسی جماعت جیسا اپنانا ہوگا۔ذرائع کے مطابق حکومتی اتحادیوں کے درمیان تقریباً ڈیڑھ گھنٹے ملاقات جاری رہی۔ مسلم لیگ ن کی لیگل ٹیم نے پیپلز پارٹی کو پی ٹی آئی سے متعلق فیصلوں پر اعتماد میں لیا۔ ذرائع کے مطابق وزیر قانون اور اٹارنی جنرل نے پی ٹی آئی پر پابندی کے حکومتی فیصلہ کے قانونی نکات سے آگاہ کیا۔ ذرائع کے مطابق پیپلز پارٹی کی لیگل ٹیم نے مستقبل میں ان فیصلوں کے اثرات پر تشویش کا اظہار کیا۔ پی پی نے حکومتی فیصلوں پر پارٹی میں مشاورت اور سی ای سی سے توثیق لینے کا کہا۔ ذرائع کے مطابق مسلم لیگ ن اور پیپلز پارٹی کے درمیان پی ٹی آئی سے متعلق تمام فیصلے اتفاق رائے سے کرنے پر اتفاق کیا گیا جبکہ دونوں جماعتوں کے درمیان بات چیت جاری رکھنے پر بھی اتفاق ہوا۔

رہائی کے بعد پاکستان تحریک انصاف کی کارکن صنم جاوید کا پہلا بیان سامنے آگیا ہے۔پاکستان تحریک انصاف کی کارکن صنم جاوید نے رہائی کے بعد پہلی مرتبہ پارلیمنٹ ہاؤس پہنچنے کے بعد میڈیا سے گفتگو کرتے ہوئے کہا کہ جان کی بازی لگا دوں گی لیکن پیچھے نہیں ہٹوں گی۔ مریم نواز اور وزیراعظم شہباز شریف نے میرے خلاف جھوٹے مقدمات قائم کیے۔انہوں نے کہا کہ عدالتوں نے مجھے بے گناہ قرار دے کر رہا کر دیا مگر مجھے ڈرایا دھمکایا جا رہا ہے۔ میرے گھر والے محفوظ نہیں ہیں، چھوٹے چھوٹے معصوم بچوں کو ڈرایا جا رہا ہے۔ آج میں اکیلی نہیں ہوں پاکستان کے 25 کروڑ عوام میرے ساتھ کھڑے ہیں۔صنم جاوید نے کہا کہ مریم نواز فارم 47 کے تحت جیتی ہے، اسے چیلنج کرتی ہوں کہ وہ دوبارہ الیکشن لڑ کر دیکھ لے اگر میں ہار گئی تو سیاست سے دستبردار ہو جاؤں گی۔انہوں نے کہا کہ جس طرح ریحانہ ڈار جنہیں لیڈی آئرن کا خطاب دیا گیا، انہوں نے خواجہ آصف کو شکست دی اسی طرح مریم نواز کوشکست سے دوچار کروں گی۔پی ٹی آئی کی کارکن نے کہا کہ گزشتہ تین سالوں سے ظلم کی چکی میں پس رہی ہوں مگر ڈرنے والی نہیں ہوں۔ میری زندگی کا مقصد یہ ہے کہ جن لوگوں نے گزشتہ کہیں دہائیوں سے پاکستان میں کھربوں روپے کی کرپشن کی اور ملک کو دیوالیہ کر دیا ان کو بے نقاب کر کے چھوڑوں۔

پاکستان پیپلزپارٹی نے مخصوص نشستوں پر نظرثانی اپیل کی حمایت کردی ہے۔ذرائع کے مطابق ن لیگ اور پیپلزپارٹی کے رہنماؤں کی ایوان صدر میں بڑی بیٹھک ہوئی جس میں ن لیگ کی لیگل ٹیم نے پیپلزپارٹی کو نظرثانی اپیل پر بریفنگ دی۔ذرائع کا کہنا ہے کہ پیپلزپارٹی نے مخصوص نشستوں پر نظرثانی اپیل کی حمایت کردی ہے جب کہ پی ٹی آئی پر پابندی کا معاملہ پہلے پارٹی سطح پر زیرغورلانے پر اتفاق کیا گیا ہے۔پیپلزپارٹی نے موقف اختیار کیا کہ پابندی کا فیصلہ پارلیمان اور کابینہ میں زیر غور لایا جائے۔دوسری جانب وزیراعظم شہبازشریف اور اسپیکر ایاز صادق کی ملاقات ہوئی جس میں سپریم کورٹ کے مخصوص نشستوں سے متعلق فیصلے پرتبادلہ خیال کیا گیا۔

ذرائع نے بتایا کہ ملاقات میں پارلیمانی امور سمیت اہم قانون سازی پر بھی تبادلہ خیال کیا جب کہ ایوان کی کارروائی اور اپوزیشن کے کردار کا معاملہ بھی زیر بحث آیا۔ذرائع کے مطابق قومی اسمبلی کا اجلاس پیر کو بلائے جانے پر مشاورت کی گئی جب کہ حکومت نے عدالتی احکامات کے جواب میں سخت ردعمل دینے کا پلان بنالیا ہے۔ذرائع نے مزید کہا کہ حکومت نے پارلیمانی فورم کو بھرپور انداز میں استعمال کرنے کا فیصلہ کیا ہے، حکومتی اتحاد ججز کے فیصلے کا جواب پارلیمان سے دے گا

جسٹس (ر) طارق مسعود اور جسٹس (ر) مظہرعالم میاں خیل کی سپریم کورٹ میں بطور ایڈہاک جج تعیناتی کی منظوری دے دی گئی۔

چیف جسٹس قاضی فائزعیسیٰ کی زیر صدارت جوڈیشل کمیشن کا اجلاس ہوا جس میں جسٹس (ر) طارق مسعود کی بطور ایڈہاک جج تعیناتی کی منظوری دی گئی۔

جسٹس منیب اختر نے جسٹس (ر) سردار طارق مسعود کی تعیناتی کی مخالفت کی، ان کی تعیناتی کی 8 ممبران نے منظوری دی جب کہ بطور ایڈہاک جج ایک سال تعیناتی کی منظوری دی گئی ہے۔

علاوہ ازیں جسٹس (ر) مظہرعالم میاں خیل کی بھی 6 اور 3 کے تناسب سے منظوری دی گئی ہے۔

جسٹس (ر) مظہرعالم میاں خیل نے ایڈہاک جج تعیناتی سے معذرت کی تھی تاہم جوڈیشل کمیشن نے جسٹس (ر) مظہرعالم میاں خیل کی بھی تعیناتی کی منظوری دے دی ہے۔

عالمی ریٹنگ ایجنسی موڈیزنے پاکستانی معیشت سے متعلق مثبت پیش گوئی کرتے ہوئے خبردار کیا ہے کہ مہنگائی کی وجہ سے سماجی تناؤ بڑھنے کا خدشہ ہے اورمشکل اصلاحات کو مسلسل نافذ کرنے کا مضبوظ انتخابی مینڈیٹ نہ ہونا خطرات پیدا کرسکتا ہے۔موڈیز کی رپورٹ کے مطابق آئی ایم ایف کے نئے پروگرام سے پاکستان کیلئے فنڈنگ کے امکانات میں بہتری آئے گی، نیا آئی ایم ایف پروگرام فنانسنگ کےمعتبر ذرائع فراہم کرے گا۔موڈیز کے مطابق ان میں دیگرممالک، عالمی مالیاتی اداروں سے فنڈنگ کا حصول شامل ہے، مہنگائی کی وجہ سے سماجی تناؤ بڑھنے کا خدشہ ہے۔رپورٹ کے مطابق زیادہ ٹیکسوں، توانائی کےنرخوں میں مستقبل کی ایڈجسٹمنٹ اصلاحات پردباؤڈال سکتی ہے جبکہ مشکل اصلاحات کو مسلسل نافذ کرنے کا مضبوظ انتخابی مینڈیٹ نہ ہونا خطرات پیدا کرسکتا ہے۔