لاہور کے صنعت کار اور تاجر بھی مہنگی بجلی کے خلاف میدان میں آگئے اور فیکٹریاں بند کرکے چابیاں حکومت کے حوالے کرنے کا اعلان کر دیا۔ لاہور چیمبر میں آئی پی پیز کے کپیسٹی چارجز اور مہنگی بجلی کے خلاف صنعت کاروں اور تاجروں کا ہنگامی اجلاس ہوا جس میں آئی پی پیز کے فارنزک آڈٹ کا مطالبہ کیا گیا۔قائد اعظم انڈسٹریل اسٹیٹس ایسوسی ایشن کے رہنماؤں عدیل بھٹہ اور میاں خرم الیاس کا کہناتھاکہ مہنگی بجلی کے باعث کاروبارنہیں کرسکتے، فیکٹریاں بند کرکے چابیاں حکومت کے حوالے کر دیں گے۔صنعت کاروں نے متفقہ مطالبہ کیا کہ مہنگی بجلی سے نجات کیلئے آئی پی پیز سے معاہدوں پر نظر ثانی کی جائے۔

ویمنز ایشیا کپ کے دوسرے سیمی فائنل میں میزبان سری لنکا کی ویمنز ٹیم نے دلچسپ مقابلے کے بعد پاکستان ویمنز ٹیم کو 3 وکٹوں سے شکست دے کر فائنل کیلئے کوالیفائی کرلیا۔دمبولا میں کھیلے گئے ویمنز ایشیا کپ کے دوسرے سیمی فائنل میں سری لنکن ویمنز ٹیم نے ٹاس جیت کر پاکستان کو پہلے بیٹنگ کی دعوت دی۔ پاکستان ویمنز ٹیم نے مقررہ 20 اوور میں 4 وکٹوں کے نقصان پر 140 رنز بنائے، منیبہ علی 37 اور گل فیروزہ نے 25 رنز کی اننگز کھیلی۔سری لنکا کی جانب سے کاویشا اور اودیشیکا نے 2 ،2 کھلاڑیوں کو آؤٹ کیا۔پاکستان کا 141 رنز کا ہدف سری لنکا ویمنز نے 7 وکٹ کے نقصان پر آخری اوور میں پورا کرلیا۔ ویمنز ایشیا کپ: بنگلادیش کو شکست دیکر بھارتی ٹیم فائنل میں پہنچ گئیسری لنکا کی جانب سے چماری اتھاپتھو نے 63 رنز کی اننگز کھیلی جبکہ انوشکا 24 رنز کے ساتھ ناقابل شکست رہیں۔یوں سری لنکا ویمنز نے 3 وکٹوں سے کامیابی حاصل کرکے ایشیا کپ کے فائنل میں جگہ بنالی جہاں اس کا مقابلہ بھارت سے ہوگا۔

2024 کے اولمپک گیمز کی رنگارنگ افتتاحی تقریب آج سے فرانس کے شہر پیرس میں شروع ہورہی ہے، اس میگا ایونٹ میں 206 ممالک سے 10 ہزار 500 ایتھلیٹس حصہ لیں گے۔یہ تمام ایتھلیٹس 32 کھیلوں میں 329 طلائی تمغوں کے لیے میدان میں اتریں گے ، 100 سال مکمل ہونے کے ساتھ ساتھ 2024 کی افتتاحی تقریب ایک غیر معمولی، تفریحی اور انوکھا جشن ہونے والی ہے۔یہاں ہم پیرس اولمپکس کے حوالے سے کچھ دلچسپ اور منفرد معلومات آپ کے ساتھ شئیر کررہے ہیں ۔اولمپکس کی افتتاحی تقریب جمعہ 26 جولائی کو مقامی وقت کے مطابق شام 7 بجکر 30 بجے (پاکستانی وقت کے مطابق رات ساڑھے دس بجے) ہے۔100 سال بعد پہلی بار میزبانی2024 اولمپکس 1924 کے بعد پہلی بار پیرس میں کھیلے جائیں گے، یوں تقریبا ایک صدی بعد پیرس ان اولمپکس کی میزبانی کررہاہے ، اس سے قبل 1900 اور 1924 میں اس نے اولمپکس کی میزبانی کی تھی۔پیرس تین بار اولمپکس کی میزبانی کرنے والا دوسرا شہر بننے کا اعزاز بھی اپنے نام کرنے جارہا ہے اس سے قبل لندن نے 1908، 1948 اور 2012 میں میزبانی کی تھی۔افتتاحی تقریب کسی سٹیڈیم میں نہیںپیرس میں اس بار پیرس اولمپکس گیمز کی افتتاحی تقریب کسی سٹیڈیم میں نہیں بلکہ فرانس کے دارالحکومت پیرس کے مشہور دریائے سین کے ساتھ چھ کلومیٹر طویل راستے پر منعقد ہو گی، یہ فاصلہ آسٹرلٹز پل سے شروع ہو کر ایفل ٹاور کے زیرِ سایہ ٹروکیڈیرو میں باغات، فواروں اور محلات کے درمیان ختم ہوگا۔اولمپکس میں شامل کھیلوں کی بات کی جائے تو تقریبا 32 کھیل اس ایونٹ میں شامل ہیں اور ایونٹ کے متعدد کھیل فرانس کے دیگر 16 شہروں میں بھی ہوں گے۔سرفنگاس ایونٹ میں سرفنگ کا مقابلہ سب سے منفرد اور حیرت انگیز ہوگا، جو بحرالکاہل کے ایک فرانسیسی علاقے تاہیٹی پر منعقد ہوگا ، پیرس سے 15 ہزار کلومیٹر دور واقع سمندر کی لہروں پر سرفنگ کا مقابلہ انتہائی دلچسپ ہوگا۔بریکنگ ، ایک نیا اولمپک کھیلبریکنگ ، پیرس گیمز میں ایک نیا اولمپک کھیل متعارف کروایا جائے گا جسے بریکنگ ڈانس کہتے ہیں، اس مقابلے میں دو ایونٹس ہوں گے، ایک مردوں کا اور ایک خواتین کا ، یہ مقابلہ 2018 کے بعد پہلی بار 9 اور 10 اگست کو پیرس میں منعقد ہوگا۔اس کے علاوہ سپورٹس کلائمبنگ، سکیٹ بورڈنگ اور سرفنگ بھی نئے کھیلوں میں شامل ہیں۔دریائے سین میں تیراکیاولمپکس گیمز کے دوران کھلے پانی میں تیراکی کے کئی مقابلوں کی دریائے سین کئی دہائیوں بعد پہلی بار میزبانی کرے گا، جن میں اولمپک گیمز میں میراتھن تیراکی اور اولمپک اور پیرا اولمپک ٹرائیتھلون کی تیراکی شامل ہیں۔دریائے سین کو 1900 میں پہلی بار پیرس گیمز کے دوران کچھ ایونٹس کے لیے استعمال کیا گیا تھا، 1923 سے لے کر ابھی تک دریائے سین کے پانی کے معیار کے مسائل کی وجہ سے یہاں تیراکی پر پابندی لگائی گئی تھی اور کئی دہائیوں تک یہ دریا مچھلیوں کے لیے بھی زہریلا پانی بن گیا تھا۔تاہم پیرس کے منتظمین نے یقین دلایا ہے کہ اولمپکس کے دوران پانی تیرنے کے لیے صاف ہو گا۔پہلی بار خواتین اور مردوں کی تعداد برابراس ایونٹ کی ایک دلچسپ بات یہ بھی ہے کہ یہ پہلا اولمپکس ہوگا جس میں مرد اور خواتین ایتھلیٹس کی تعداد برابر ہوگی، 10 ہزار 500 کھلاڑیوں میں سے 5 ہزار 250 مرد اور 5 ہزار 250 ہی خواتین شامل ہیں ۔کھلاڑیوں کے کمروں میں ’اے سی‘ نہیں ہوگاپیرس 2024 میں ایتھلیٹس کے کمروں میں ایئرکنڈیشن (اے سی) نہیں رکھا گیا ہے ، کیونکہ اس بار اولمپک گیمز کو ماحول دوست بنانے کی کوشش کی گئی ہے۔ائر کنڈیشنگ استعمال کرنے کے بجائے جن عمارتوں میں کھلاڑی قیام کریں گے وہ عمارت یا کمرے جدید طریقوں سے ڈیزائن کیے گئے تاکہ وہ قدرتی طور پر ٹھنڈی رہیں ، یعنی عمارتوں کو براہ راست سورج کی روشنی سے بچانے کے لیے ڈیزائن کیا گیا ہے جو انہیں ٹھنڈا رکھنے میں مدد کرتا ہے۔پیرس میٹرو میں اے آئی ٹرانسلیشن کی ڈیوائسزایونٹ کے انتظامات کو بہترین بنانے کیلئے پیرس کے پبلک ٹرانسپورٹ سسٹم کی انتظامیہ نے اپنے 3 ہزار سے زائد عملے کے ارکان کو اے آئی ٹرانسلیشن کی ڈیوائسز دی ہیں تاکہ ہزاروں سیاحوں کو اولمپک کے دوران راستہ تلاش کرنے میں مدد مل سکے، یہ اے آئی ڈیوائس فرانسیسی سمیت 16 مختلف زبانوں کا ترجمہ کر سکتا ہے۔اس سے قبل اولمپک مشعل نے 16 اپریل 2024 کو اولمپیا، یونان سے آغاز کیا جہاں کبھی قدیم اولمپکس منعقد ہوتے تھے، مشعل نے ایتھنز سے بحیرہ روم کا راستہ اختیار کیا ، فرانس کے 400 قصبوں اور درجنوں سیاحتی مقامات سے گزرتے ہوئے کیریبین، بحر ہند اور بحرالکاہل میں مین لینڈ اور سمندر پار فرانسیسی علاقوں میں 12ہزار کلومیٹر (7،500 میل) کا سفر طے کرتی ہوئی ایفل ٹاور تک پہنچ چکی ہے ۔اولمپک ریلے پیرس اولمپکس کی افتتاحی تقریب میں مرکزی مشعل روشن کرنے کے ساتھ اختتام پذیر ہوگی۔

پنجاب بار کونسل نے کل صوبے بھر میں ہڑتال کی کال دے دی۔پنجاب بار کونسل نے مطالبہ کیا ہے کہ صوبہ بھر کے وکلاء کل عدالتوں میں پیش نہ ہوں، سیاسی پارٹیز کے نمائندگان اور وکلاء کی گرفتاریوں کا سلسلہ بند کیا جائے، لاہور میں سول عدالتوں کی تقسیم کا نوٹیفکیشن فوری واپس لیا جائے۔پنجاب بار کونسل نے مطالبہ کیا کہ حکومت کورٹ فیس کے اضافے کو فوری واپس لے، پنجاب پولیس نے صوبے کو پولیس سٹیٹ بنا رکھا ہے، پولیس عدالتی احکامات کی کھلم کھلا خلاف ورزی کر رہی ہے، حکومت مہنگائی اور لاء اینڈ آرڈر کی صورتحال کنٹرول کرنے میں ناکام ہو چکی ہے، حکومت آئے روز ٹیکسز لگانا اور بجلی کے بلوں میں اضافے سے عوام کا خون چوسنے میں مصروف ہے۔

امیر جماعت اسلامی حافظ نعیم الرحمان نے کہا ہے کہ کارکنان کو جہاں رکاوٹ ملے وہیں دھرنا دے دیں، ہم ایک دھرنے کو کئی دھرنوں میں تبدیل کریں گے۔ایک ویڈیو بیان میں حافظ نعیم الرحمان نے تمام کارکنوں کو اسلام آباد پہنچنے کی ہدایت کرتے ہوئے کہا کہ دھرنے کے لیے پورے ملک سے قافلے روانہ ہو چکے ہیں، تمام فسطائیت کے بعد بھی کارکنان کو کہتا ہوں کہ مینیج کریں اور دھرنے میں پہنچیں۔ان کا کہنا تھا کہ ہم پر امن لوگ ہیں اور پر امن رہنا چاہتے ہیں، اس کی ذمہ داری حکومت پر آتی ہے کے وہ کیسے امن قائم رکھتے ہیں؟ تمام نمائندگان کو کہتا ہوں جہاں رکاوٹ ملے وہیں دھرنا دے دیں، ہم ایک دھرنے کو کئی دھرنوں میں تبدیل کریں گے۔امیر جماعت اسلامی کے مطابق کارکنان کو کہتا ہوں رکاوٹ کے آگے دھرنا دے کر قیادت کی کال کا انتظار کریں، ہم بتائیں گے کہ عوام کی طاقت کو کنٹینر لگا کر نہیں روکا جا سکتا، ہمیں بجلی کے بل کم چاہئیں اور آئی پی پیز سے چھٹکارا چاہیے۔دوسری جانب لاہور میں پولیس نے پی ٹی آئی اور جماعت اسلامی کے لیے 60 سے زائد مقامات پر چھاپے مارے۔ پولیس ذرائع کے مطابق رات گئے مارے جانے والے چھاپوں میں 110 افراد کو حراست میں لے لیا گیا۔حراست میں لیے گئے افراد کا تعلق پی ٹی آئی اور جماعت اسلامی سے ہے۔

امیر جماعت اسلامی حافظ نعیم الرحمان کا کہنا ہے کہ یہ عوام کے حقوق کی جنگ ہے، ہم ان کیلئے دھرنا دینے آئے ہیں، حکومت سے بس ایک ہی مطالبہ ہے کہ عوام کو ریلیف دیں۔اسلام آباد کے سیکٹر آئی ایٹ میں دھرنے کے شرکاء سے خطاب کرتے ہوئے حافظ نعیم الرحمان نے کہا کہ احتجاج ہمارا حق ہے، گرفتار کارکن رہا کیے جائیں، آئی پی پیز کو مسلط کر رکھا ہے، اربوں روپے کھائے جا رہے ہیں، دھرنے کا ابھی آغاز ہوا ہے انشا اللّٰہ ہم یہی رہیں گے۔حافظ نعیم الرحمان نے کہا کہ ایک طرف آئی پی پیز ہم پر مسلط کرتے ہیں اوپر سے گرفتاریاں بھی کرتے ہو، یہ دھرنے کا اختتام یا ٹھہراؤ نہیں بلکہ ابتداء ہے، ہم مختلف جگہوں پر بیٹھیں گے، پورے پاکستان میں دھرنے دیں گے، ہمارا اگلا پڑاؤ مری روڈ ہے، اگلا لائحہ عمل وہاں بتاؤں گا۔یاد رہے کہ اسلام آباد اور راولپنڈی کے مختلف مقامات پر دھرنے دینے کے اعلان کے بعد جماعت اسلامی نے جڑواں شہروں کے 4 مقامات پر دھرنا دے دیا۔مہنگی بجلی اور ٹیکسوں کے خلاف جماعت اسلامی نے مری روڈ راولپنڈی، زیرو پوائنٹ اسلام آباد، چونگی نمبر 26، جبکہ راولپنڈی میں لیاقت باغ کے باہر دھرنا دیا ہے۔

نیوٹیک اور دی نور پروجیکٹ، لاہور نے ٹیکنیکل اینڈ ووکیشنل ایجوکیشن اینڈ ٹریننگ سیکٹر میں تعاون کے لیے مفاہمت کی یادداشت پر دستخط کیے۔لاہور، پاکستان – 22 جولائی، 2024 – نیوٹیک (نیشنل یونیورسٹی آف ٹیکنالوجی) اور دی نور پروجیکٹ، لاہور نے ٹیکنیکل اینڈ ووکیشنل ایجوکیشن اینڈ ٹریننگ کے شعبے میں تعاون کے لیے مفاہمت کی ایک یادداشت پر دستخط کیے ہیں۔ایم او یو پر دستخط لاہور میں منعقدہ ایک تقریب میں کیے گئے، جہاں دی نور پروجیکٹ کے سی ای او کرنل مصدق (ر) نے نیوٹیک کے پرو ریکٹر میجر جنرل خالد جاوید (ر)کا استقبال کیا۔تقریب کے دوران، پرو ریکٹر نیوٹیک میجر جنرل خالد جاوید (ر) نے خاص طور پر معاشرے کے کم مراعات یافتہ طبقے کی بہتری کے لیے دی نور پروجیکٹ کے کام کو سراہانیوٹیک کے پرو ریکٹر میجر جنرل نے کہا، “ہم خطے میں ٹیکنیکل اینڈ ووکیشنل ایجوکیشن سسٹم کو بڑھانے کے لیے دی نور پروجیکٹ کے ساتھ شراکت کرنے کے لیے پرجوش ہیں۔” “یہ تعاون ہمیں اپنی مہارت اور وسائل سے فائدہ اٹھانے کے قابل بنائے گا تاکہ پسماندہ افراد کے لیے مزید مواقع پیدا کر سکیں اور کمیونٹی کی پائیدار ترقی میں اپنا حصہ ڈال سکیں۔”نور پراجیکٹ کے سی ای او، کرنل مصدق (ر) نے شراکت داری کے لیے اپنے جوش و خروش کا اظہار کرتے ہوئے کہا، “یہ ایم او یو نیوٹیک اور دی نور پروجیکٹ کے درمیان ایک نتیجہ خیز تعاون کا آغاز ہے۔ ہمیں یقین ہے کہ اپنی کوششوں کو یکجا کرکے، ہم ایک اہم کام کر سکتے ہیں۔ اس شراکت داری کا مقصد تعاون کے مختلف شعبوں کو تلاش کرنا بشمول مشترکہ تحقیق اور ترقی، فیکلٹی اور طلباء کے تبادلے کے پروگرام، اور صنعت سے متعلقہ نصاب اور تربیتی پروگراموں کی ترقی ہے۔