۔وفاقی وزیر داخلہ محسن نقوی نے تھانہ کھنہ اسلام آباد کا اچانک دورہ کیا ، تفتیشی افسران اپنے کمروں سے غائب پائے گئے اور ڈیوٹی افسر کسی بات کا تسلی بخش جواب نہ دے سکے جبکہ فرنٹ ڈیسک سگریٹ کے دھواں سے بھرا ہوا پایا گیا ۔

ترجمان وزارت داخلہ کے مطابق وفاقی وزیرداخلہ محسن نقوی بغیر اطلاع تھانہ کھنہ پہنچ گئے جہاں پر اپنی ڈیوٹی کی جگہوں کی بجائے تفتیشی افسران کمروں میں جبکہ ایک کمرے میں دو نشئی سوئے ہوئے پائے گئے ۔ وزیر داخلہ نے تھانے کے اندر 1500 موٹرسائیکلیں اور کئی گاڑیاں کھڑی ہونے کی وجہ پوچھی تو ڈیوٹی افسر اس کا بھی جواب نہ دے سکا ۔وزیر داخلہ محسن نقوی نے تھانے کی حالت زار دیکھ کر ناراضگی کا اظہار کیا۔وزیرداخلہ نے فرنٹ ڈیسک، محررروم اور حوالات کا دورہ کیا۔ وزیرداخلہ محسن نقوی نے حوالات میں بند ملزمان سے کیسوں کے بارے دریافت کیا اور غلط جگہ ریڑھی لگانے والے 4 افراد کو ضروری قانونی کارروائی مکمل کرکے چھوڑنے کا حکم دیا۔ محسن نقوی نے تاکید کی کہ تھانے میں اس قدر زیادہ موٹرسائیکلز کھڑی کرنے کا کوئی جواز نہیں،

موٹرسائیکلز جن شہریوں کی ہیں، ان کے حوالے کی جائیں۔ وزیرداخلہ نے سائلین کی بلاتاخیر دادرسی کا حکم دیا اور تنبیہہ کی کہ سائلین کو بلاوجہ انتظار کرانا کسی صورت برداشت نہیں ہوگا، چیف کمشنر اسلام آباد محمد علی رندھاوا بھی ان کے ہمراہ تھے۔

۔قومی اسمبلی میں فلسطینی رہنما اسماعیل ہنیہ کی غائبانہ نمازِ جنازہ ادا کردی گئی۔

اسماعیل ہنیہ کی غائبانہ نمازِ جنازہ تمام پارٹیوں کے ارکانِ اسمبلی نے ادا کی۔

غائبانہ نمازِ جنازہ میں وزیراعظم شہباز شریف، اسپیکر ایاز صادق اور پی ٹی آئی رہنما بیرسٹر گوہر بھی شریک ہوئے۔

قومی اسمبلی میں آج حماس کے سربراہ اسماعیل ہنیہ کے قتل کے خلاف مذمتی قرارداد بھی منظور کی گئی ہے۔

معروف ڈرامہ نگار خلیل الرحمان قمر نے نازیبا ویڈیوز کے خلاف سائبر کرائم میں درخواست دے دی، جس میں انہوں نے مؤقف اپنایا ہے کہ ملزمان نے دھوکے سے بلا کر نازیبا ویڈیوز بنائیں۔اپنی درخواست میں خلیل الرحمان قمر نے کہا کہ ملزمان نے مجھے بلیک میل کرکے بھاری رقم بھی بٹور لی، انہوں نے رقم دینے سے انکار پر نازیبا ویڈیوز وائرل کردیں۔خلیل الرحمان قمر نے کہا کہ نازیبا ویڈیوز وائرل ہونے سے میری ساکھ کو نقصان پہنچا، کارروائی کی جائے۔دوسری جانب اس حوالے سے سائبر کرائم حکام کا کہنا ہے کہ انہیں درخواست مل چکی ہے، تحقیقات جلد شروع کی جائیں گی۔پولیس کا کہنا ہے کہ خلیل الرحمان قمر کو 15 جولائی کو مبینہ طور پر اغوا کرکے تشدد کا نشانہ بنایا گیا تھا، ملزمان کے خلاف 21 جولائی کو تھانہ سندر میں مقدمہ درج کر لیا گیا تھا۔پولیس کا مزید کہنا ہے کہ مرکزی ملزم حسن شاہ اور لڑکی سمیت 12 ملزمان پولیس کی تحویل میں ہیں، مرکزی ملزم 28 جولائی کو پکڑا گیا تھا، 29 جولائی کو ڈرامہ نگار کی نازیبا ویڈیو وائرل ہوئی۔

رہبر انقلاب اسلامی کل صبح 8:30 بجے تہران یونیورسٹی میں شہید اسماعیل ہنیہ کی نماز جنازہ پڑھائیں گے۔ نماز جنازہ کے بعد تہران یونیورسٹی سے آزادی اسکوائر تک شہید اسماعیل ہنیہ کی تشییع جنازہ ہوگی جس میں ایران کے غیور عوام بڑے پیمانے شرکت کریں گے۔یاد رہے کہ تہران میں شہدائے خدمت یعنی شہید صدر ابراہیم رئیسی، شہید وزیر خارجہ حسین امیر عبداللہیان اور دیگر کی تشییع جنازہ میں تحریک حماس کے سیاسی دفتر کے سربراہ اسماعیل ہنیہ نے بھی شرکت کی تھی۔اس موقع پر حماس کے سربراہ اسماعیل ہنیہ نے کہا تھا کہ اے میرے عزیز ایرانی بھائیو آپ کی خدمت میں سلام عرض کرتا ہوں اور یہ کہنا چاہتا ہوں کہ میں فلسطین کی بہادر اور ثابت قدم قوم کی جانب سے ایران کے شہید صدر اور شہید وزیر خارجہ کی نماز جنازہ اور آخری رسومات میں شرکت کے لئے آیا ہوں۔اسماعیل ہنیہ نے کہا کہ جنرل سلیمانی نے اپنی ساری زندگی فلسطین کی حمایت اور جدوجہد میں گزاری اور وہ قدس کے کمانڈر تھے اور قدس کے شہید ہیں ۔فلسطین کی اسلامی مزاحمتی تنظیم حماس کے سربراہ اسماعیل ہنیہ نے شہید جنرل قاسم سلیمانی کی نماز جنازہ کے اجتماع سے بھی خطاب کیا تھا اس موقع پر انہوں نے کہا تھا کہ جنرل قاسم سلیمانی قدس کے شہید ہیں اور امریکہ کی جانب سے استقامتی محاذ کو کمزور کرنے کی کوششوں اور قتل و غارتگری کے باوجود استقامتی محاذ کو شکست نہیں ہو گی اور جب تک فلسطین اور قدس سے غاصبوں کو باہر نہیں نکالتے اس وقت تک ہماری غاصبوں اور جارحین کے خلاف جدوجہد جاری رہے گی۔اسماعیل ہنیہ کا کہنا تھا کہ ہم پیچھے نہیں ہٹیں گے اور اللہ تعالی کے فضل و کرم سے اپنی منزل پا لیں گے۔ انہوں نے اپنے خطاب کے آخر میں کہا جس طرح لبنان اور غزہ میں ہم کامیاب ہوئے تھے اسی طرح اب بھی ہم کامیاب و کامران ہوں گے۔حماس کے ہر دلعزیز رہنما اور استقامتی محاذ کے مجاہد اسماعیل ہنیہ کو قدس کی غاصب اور جابر صیہونی حکومت نے کل آدھی رات کو ایک بزدلانہ کارروائی کرتے ہوئے تہران میں شہید کردیا۔ ایران کی حکومت نے اسماعیل ہنیہ کی شہادت پر پورے ملک میں 3 روز کے عام سوگ کا اعلان کیا۔

ایران میں حماس کے رہنما اسماعیل ہنیہ کے اسرائیلی حملے میں شہید ہونے کے بعد قم کی مسجد میں انتقام کی نشانی سرخ پرچم لہرا دیا گیا۔ قم کی جمکران مسجد میں سرخ پرچم لہرایا گیا جو ایران کی روایت کے مطابق خون کا بدلہ خون ہوتا ہے۔اس سے قبل 2020 میں بھی قم کی مسجد جمکران میں اس وقت سرخ پرچم لہرایا گیا تھا جب پاسداران کے کمانڈر قاسم سلیمانی کو عراق میں امریکی حملے میں نشانہ بنایا گیا تھا۔ایرانی حکومت نے حماس کی سیاسی ونگ کے سربراہ اسماعیل ہنیہ کی اسرائیلی حملے میں شہادت کے بعد تین روزہ قومی سوگ کا بھی اعلان کر دیا۔یہ بھی پڑھیں: ایران پر اسماعیل ہنیہ کا بدلہ لینا فرض ہوگیا؛ آیت اللہ خامنہ ایایرانی میڈیا کے مطابق حکومت نے ایک بیان کے ذریعے اعلان کیا کہ 31 جولائی، یکم اور 2 اگست کو ملک بھر میں اسماعیل ہنیہ کو شہید کیے جانے پر قومی سوگ منایا جائے گا۔ایران نے بیان میں اسرائیل کے ظالمانہ اقدام کی مذمت کی جو نئے صدر مسعود پزشکیان کی حلف برداری کے بعد تہران میں پیش آیا۔سپریم لیڈر آیت اللہ علی خامنہ ای نے اسرائیل کو سخت سے سخت سزا کے لیے خبردار کرتے ہوئے کہا ہے کہ اسماعیل ہنیہ کی موت کا بدلہ لینا ایران پر فرض ہوگیا ہے۔